O Foro Económico da Galiza alerta da "desadesaceleración"

O Informe de Conxuntura Socioeconómica, presentado esta sexta feira en Vigo polo Foro Económico da Galiza, cualificou de "significativa desaceleración" a situación da actividade económica no país no segundo trimestre de 2023. O estudo, coordinado polo catedrático de economía aplicada na Universidade da Coruña, Fernando González Laxe, salienta que “ao igual que sucedera na crise de 2008, a reactivación da economía estatal é máis intensa que a rexistrada pola economía galega”, de maneira que, apunta, “a partir do segundo trimestre de 2021 o Produto Interior Bruto (PIB) na Galiza presenta sempre taxas de variación interanuais inferiores ás do conxunto do Estado español”. En concreto, no segundo trimestre de 2023 tivo un incremento interanual de 1,5%, sete décimas menos que a rexistrada no Estado español (2,2%). O paro aumenta en 2.705 persoas no mes de outubro na Galiza En termos comparados, o estudo presentado resalta que transcorridos os mesmos trimestres desde o inicio da crise económica e financeira, "o PIB galego situábase 6,5 puntos por baixo do nivel precrise, sendo este diferencial de 5,7 puntos no caso do Estado español". Contracción na industria e na construción A contracción económica máis acusada na economía galega, segundo o informe, rexístrase tanto na industria como no sector da construción, cuxo valor engadido no segundo trimestre do ano representa en torno ao 92% do nivel precrise. Como dato máis salientábel ten en conta “a desigual evolución da industria manufactureira -a que transforma a materia prima en novos bens- na Galiza e no conxunto do Estado”. Concretamente, a produción desta industria na Galiza é un 3,3% inferior á estimada a finais de 2019 “o que contrasta coa recuperación das manufacturas no Estado español (2,6% superior ao nivel acadado no cuarto trimestre de 2019)”. Neste sentido, considera que, dentro da menor produtividade relativa do tecido produtivo galego en relación á media española, "é especialmente grave no caso da industria manufactureira". A industria galega sufriu un declive de 2% en 2022 mentres a actividade fabril creceu 3% no Estado En concreto, indica, "sitúase un 5,9% por baixo da media española en termos de postos de traballo equivalente a tempo completo e un 3,7% se se mide en relación ás horas traballadas". Sobre a "moi baixa produtividade relativa da industria manufactureira", sinala que no último trimestre sitúase "en 69,8% da media estatal en termos de postos de traballo equivalente a tempo completo e en 77% en termos de horas traballadas, que se corresponden, con carácter xeral, aos valores máis reducidos dende 2008". Por último, o informe menciona o desigual comportamento do sector primario, que no conxunto do Estado é 16,5% inferior ao nivel precise fronte aos 7,6 puntos por baixo na Galiza. Demanda interna e demanda externa En relación á demanda interna e á externa, o estudo sinala que, tras tres trimestres consecutivos de contracción na Galiza, presenta unha medra interanual de 0,5%, máis de dous puntos por baixo do estimado no Estado España (2,7%). "Este significativo diferencial ven explicado, en parte, polo comportamento do consumo privado, que encadea no país catro trimestres consecutivos con taxas de variación interanuais negativas (-0,5% no segundo trimestre do ano)", asegura. Ademais, na demanda externa, nas relacións comerciais con terceiros países, o valor total das exportacións galegas no primeiro semestre do ano 2023 presenta "unha significativa desaceleración" ao medrar un 3,9% respecto ao ano anterior, en tanto que no mesmo período do ano anterior este incremento interanual situouse no 26,9%. O medre do PIB galego cae a 4,4%, até 2,4 puntos por baixo do estatal Mercado de traballo O informe tamén introduce a situación do mercado de traballo na Galiza. “A desaceleración da economía galega no segundo trimestre do ano trasládase directamente ao mercado de traballo”, asegura. Un exemplo sería que as afiliacións presentan “un incremento interanual de 1,7%, o que supón 1,3 puntos menos que o rexistrado no ano anterior”. Ademais, a poboación ocupada estimada pola enquisa de poboación activa (EPA) medra 2,3% respecto ao ano precedente, “tres décimas menos que en 2022”. Outro dato do informe reafirma a análise do estudo: o traballo equivalentes a tempo completo medra 1,9% fronte o 2,4% rexistrado no ano anterior. Esta referencia “contrasta co incremento en 2,6% do número de horas traballadas, cando no ano anterior descendera 0,8%”. Na análise da desagregación segundo sexo reflicte a desigualdade entre homes e mulleres xa que 73% das persoas ocupadas a tempo parcial na Galiza son mulleres, case cinco puntos menos que no segundo trimestre do ano anterior (77,7%); en tanto que no caso do emprego a tempo completo o seu peso relativo aumenta até o 44,2% (43,1% no mesmo período de 2022). A economía galega consolida a senda do crecemento á custa de máis precariedade En relación ao desemprego, no segundo trimestre de 2023 a poboación parada descende até as 119.700 persoas, 17.700 menos que no mesmo período do ano anterior, das que 62.500 son mulleres (52,2%) e 57.200 son homes (47,8%).