A fenda dixital lastra o acceso ás axudas da nova PAC

Produtores agrícolas e gandeiros alertan da posíbel perda de ingresos debido á aplicación da nova Política Agrícola Común (PAC), que introduce unha "enorme carga burocrática" para solicitar e xustificar estas axudas europeas. Así o denunciou onte a asociación de gandeiros Agromuralla. A entidade asegura que as explotacións agrícolas e gandeiras terán que facer "moito máis para cobrar o mesmo", cambiar rutinas de traballo e sistemas de manexo e incluso chegar a contratar unha persoa técnica para determinadas tarefas, como o abonado dos terreos. O sector asegura que a Xunta da Galiza xera "dúbidas, confusión e incerteza" ao non aprobar aínda a normativa autonómica que regula a aplicación dunhas axudas que "non son realistas". Tal e como Manuel Da Cal, coordinador xeral da Federación Rural Galega (Fruga), sinalou en Nós Diario, a Comisión Europea estabeleceu en maio de 2020 unha nova estratexia para garantir que a agricultura contribúa a lograr o obxectivo de emisión de gases de efecto invernadoiro definido na Lei Europea do Clima para o ano 2030. Os produtores ecolóxicos da Galiza, en pé de guerra contra a Xunta Este é unha das cuestións polas que Isabel Vilalba, secretaria xeral do Sindicato Labrego Galego (SLG), considera que a PAC non ten en conta a realidade da Galiza. "Pensamos que foi un erro que o Goberno galego apostara por unha PAC que se deseñara a nivel estatal e europeo", afirmou a Nós Diario. Fertilización sostíbel Precisamente, este é un dos aspectos que Óscar Pose, responsábel de servizos de Unións Agrarias (UUAA), ve máis lesivos da nova PAC. Pose considera que a chamada "fertilización sostíbel" que entraría en vigor coa nova política agraria europea é unha "metida de pata bastante ridícula por parte do Ministerio. "Non ten sentido nin está avalada por datos técnicos", sinala a Nós Diario, engadindo que a medida que obrigará a localizar todos os xurros a partir de xaneiro de 2024 será "inviábel economicamente para moitos gandeiros e gandeiras que terán que mercar un novo equipo de aplicación". Sindicatos agrarios e gandeiros ven aspectos da PAC "imposíbeis" de aplicar nas granxas galegas Alén do investimento que suporá para as instalacións galegas a adquisición de novos equipos de aplicación (cisternas e, nalgúns casos, incluso novos tractores), Óscar Pose destaca que "non hai empresas en toda Europa capaces de fabricar tal cantidade de equipamento necesario". Desta maneira, segundo Unións Agrarias, a Comisión Europea, o Goberno español e a Xunta da Galiza estarán obrigando o sector agrícola e gandeiro a cumprir unhas medidas imposíbeis, que o propio ritmo de produción e subministración do mercado non poderá satisfacer. Aumento da burocracia Coinciden os sindicatos agrarios e gandeiros da Galiza en que a nova PAC é unha política "moito máis restritiva que a anterior". Para Isabel Vilalba, secretaria xeral do Sindicato Labrego Galego (SLG), a burocracia que formula a nova PAC é "demencial", afirma, pondo como exemplo a obrigatoriedade que terán as explotacións de cumprimentar un caderno de campo dixital. "É unha barbaridade, tendo en conta que temos unha media de idade nos titulares das explotacións moi elevada", engade Isabel Vilalba. A produción ecolóxica galega comeza 2023 loitando pola súa supervivencia Desde UUAA coinciden na valoración do aumento de burocracia que suporá a aplicación da nova PAC. "O que antes era opcional, agora é obrigatorio, e non todas as novas restricións se adaptan aos tipos de explotacións que hai na Galiza", sinala Óscar Pose. A elevada media de idade, xunto cos problemas de cobertura que existen en determinadas zonas do país, fará que o obrigado proceso de dixitalización das granxas galegas sexa, na práctica, moi complexo. "Isto ocorre no Estado español mentres outros Estados europeos contemplan que a tramitación telemática dos proxectos teña carácter voluntario, mantendo a posibilidade de as instalacións utilizaren o caderno de campo físico", sentencia Vilalba Discriminación co resto do Estado Isabel Vilalba considera que a nova PAC "seguirá afondando" con gran parte das discriminacións estabelecidas na PAC anterior. Vilalba pon un exemplo: "Temos persoas que cotizan á seguridade social na Galiza e non reciben PAC ou reciben unha axuda moi baixa, cando no resto do Estado ocorre o contrario: hai gran cantidade de preceptores que nin cotizan". As mulleres cobran a metade de axudas da Política Agrícola Común que os homes Igualmente, a secretaria xeral do SLG alerta de que moitos produtores e produtoras de horta, vide e gandarías de pequena escala (as maioritarias no país), "ficarán excluídos da nova PAC ou recibirán unha axuda moi baixa" en comparación con produtores equivalentes noutros puntos do Estado español.