Carabuñas, unha empresa de Vilar de Santos, realizou unha exhaustiva análise físico-química para determinar a composición das bagas e das flores do sabugueiro cultivado na Galiza (Sambucus nigra).
A iniciativa conta co apoio da Axencia Galega de Innovación (GAIN) e a Asociación Nacional de Fabricantes de Conservas (Anfaco) conclúe que este arbusto, tan habitual na paisaxe galega, ten un alto contido en compostos fenólicos e que a súa capacidade antioxidante “é comparábel á doutras froitas como o maqui e incluso superior á proporcionada polos arandos ou a baga de azaí”, segundo apuntan nun comunicado.
Estas propiedades e á súa accesibilidade, fan que tanto as bagas como as flores do sabugueiro teñan cada vez máis aplicacións, en concreto “en forma de complementos alimenticios, ingredientes nutracéuticos ou como materias primas para a industria farmacéutica”, explican.
Produción artesanal
Desde o 2011 esta microempresa agrolimentaria produce de maneira artesanal unha polpa coas bagas de sabugueiro maduras e seleccionadas previamente coa que elabora a súa liña de produtos centrada nas marmeladas e nos licores de alta calidade e que se comercializa baixo a marca de Carabuñas.
Estes resultados apuntan ao sabugueiro como un “recurso dun enorme potencial de aproveitamento e o seu uso por parte de Carabuñas está completamente aliñado coa tendencia observada no mercado a incorporar en alimentos saudábeis ingredientes procedentes de fontes naturais e con propiedades funcionais”, indican.
As bagas do sabugueiro compóñense, principalmente, de azucres, ácidos orgánicos, antocianinas e quercetinas. Estes dous últimos compostos forman parte do grupo dos flavonoides que proporcionan a esta planta propiedades antioxidantes, antiinflamatorias e inmunoestimulantes.
Plan de innovación
Un dos obxectivos do Plan de innovación desenvolvido nos últimos meses por Carabuñas é favorecer a expansión da empresa e abrirse a novos mercados. Por iso, a primeira parte do proxecto consistiu na implementación de protocolos de traballo para a xestión da I+D+i e o seguimento tecnolóxico.
Alén diso, a empresa tamén traballou no desenvolvemento de produtos e procesos coa fin de poñer en valor as propiedades saudábeis desta materia prima e a procura de novas estratexias de diversificación.
