O Goberno español di que "vixiará" as marxes de beneficio dos supermercados, mais que fan Portugal e Francia?

A vicepresidenta primeira e ministra de Asuntos Económicos e Transformación Dixital do Estado español, Nadia Calviño, afirmou esta quinta feira que "hai que seguir moi de perto a evolución das marxes [empresariais], porque neste momento todos temos que contribuír a que se modere a evolución dos prezos dos alimentos". O prezo dos alimentos subirá 12% en 2023 Así se manifestou despois de que o Banco de España revisase á alza a súa previsión de inflación media dos alimentos para 2023 desde a taxa de 7,8% prognosticada o pasado mes de decembro á de 12,2% estimada esta terxa feira. "O prezo dos alimentos non fixo pico", advertiu a entidade no seu último informe. A pesar do empeoramento das previsións na inflacións do alimentos, a ministra española mostrouse satisfeita das medidas impulsadas polo Executivo do que participa. "As medidas que viñemos pondo en marcha están a mostrarse efectivas e teñen percorrido, mais non podemos conformarnos", recalcou a vicepresidenta primeira. As palabras de Calviño sobre a necesidade de controlar as marxes de beneficio das empresas dedicadas á distribución de alimentos chegan nun momento no que os Estados europeos fronteirizos co español xa tomaron medidas prácticas para paliar as súas consecuencias. Portugal taxa os beneficios Desta forma, Portugal impuxo unha taxa de 33% sobre as ganancias extraordinarias das cadeas de alimentación que “estará en vigor previsibelmente até finais de 2023”. O Executivo luso define estes beneficios "excedentarios" como aqueles “que estean 20% por riba da media rexistrada no período comprendido entre 2018 e 2021”. O prezo dos alimentos sobe sen beneficiar produtoras nin transportistas “Nos casos en que se produzan estes aumentos excesivos, as contribucións permiten, nun espírito de solidariedade, xerar ingresos adicionais para que as autoridades estatais brinden apoio financeiro a familias e empresas fortemente afectadas polo aumento de prezos", explicou o Goberno portugués. "O produto destas contribucións reverte en beneficio da cidadanía. Xa sexa financiando ás persoas usuarias finais de enerxía (fogares ou empresas) e apoiando a transición enerxética, ou a través de accións para apoiar as familias ante o aumento do custo dos alimentos para os máis vulnerábeis”, continuou. "A opción portuguesa da taxa de 33%, responde a un terzo deses beneficios extraordinarios, asegurando xa a súa aplicación tanto en 2022 como en 2023. Ademais desta contribución, os beneficios destas empresas naturalmente tamén estarán suxeitos a outros impostos”, conclúe o Executivo de Portugal. Por outra parte, o Goberno luso desenvolve tamén unha operación da Autoridade de Seguridade Alimentaria e Económica (ASAE) por todo o Estado para fiscalizar os prezos dos alimentos nos supermercados, ao detectar subas nas marxes de comercialización de até 50%. Cuestionado esta semana sobre a posibilidade de estabelecer rebaixas do Imposto sobre o Valor Engadido (IVE) a determinados alimentos de igual forma que ten feito o Estado español, o primeiro ministro portugués, António Costa, declarou que "só ten sentido reducir o IVE se hai unha correspondencia na redución do prezo e na súa estabilización". Miles de persoas exixiron nas rúas de Lisboa un tope no prezo dos alimentos nos supermercados Porén, as medidas aplicadas non son suficientes para boa parte da cidadanía lusa, pois a pasada fin de semana miles de persoas manifestáronse en Lisboa, exixindo, entre outras cuestións, a intervención do Goberno para limitar o aumento dos prezos dos alimentos con medidas como o tope nos prezos. Francia pacta coas cadeas O ministro de economía francés, Bruno Le Maire, afirmou a comezos deste mes que non levará a cabo unha rebaixa do IVE dos alimentos posto que "é unha solución fácil, mais que custa moito ás finanzas públicas e non achega nada ás persoas usuarias". Pola contra, o Executivo francés acordou coas cadeas de supermercados limitar os prezos dos alimentos básicos. Os alimentos encarecen 16,6% no último ano, a maior repunta desde 2002 Cada empresa francesa de distribución encargase de decidir que e cantos alimentos quere incluír dentro da súa oferta e todos os produtos inxeridos dentro desta acción teñen que ir marcados cun logotipo especial. Co obxectivo de garantir o éxito da medida, o Ministerio de Economía francés publicará cada trimestre as marxes de beneficio das empresas distribuidoras, agrícolas e produtoras. Un estudo, realizado hai unha semana por El Diario Vasco, comparou os prezos dos mesmos produtos nas mesmas cadeas de supermercados en ambas partes da fronteira entre o Estado español e o francés, resultando a compra 22,5% máis barata nas superficies da beira gala. Croacia e Hungría topan os prezos Croacia e Hungría decidiron topar por lei o custo de determinados alimentos. O Executivo croata estabeleceu o prezo máximo do litro de aceite de xirasol en 2,12 euros, do de leite en 98 céntimos e do quilo de fariña en 80 céntimos. Pola súa parte, o Goberno húngaro fixou unha limitación xeneralizada para os alimentos básicos. Unha recente enquisa da consultora Oliver Wyman sinala que 93% da poboación do Estado español é favorábel a unha intervención dos prezos dos alimentos.