O aceite de xirasol, do que Ucraína é un dos principais países produtores, é un dos bens que primeiro empezaron a escasear nos mercados. Tanto é así que todas as distribuidoras de alimentación da Galiza decidiron limitar o número de unidades que se podían adquirir.
Mais o aceite de xirasol tamén é fundamental para a industria alimentaria galega. De feito, o presidente da patronal conserveira e da Confederación de Empresarios da Galiza (CEG), Juan Manuel Vieites, alertou onte de que o conflito derivado da incursión militar rusa na Ucraína pode producir un "desaxuste entre a oferta e a demanda" en cuestión de "tres semanas ou un mes".
Vieites recoñeceu que hai "nerviosismo" entre as empresas do sector pola "gran incerteza" que supón o conflito bélico en Ucraína, unha situación que lles levou a activar os seus plans de continxencia porque, explicou o presidente da patronal.
Mentres que "antes tiñan compras aseguradas para 6 meses, agora poden quedar desabastecidas", alertou o dirixente de Anfaco.
Medidas excepcionais
Ante esta situación, Vieites reclamou medidas "excepcionais" ás administracións española e europea para que o sector poida garantir a produción. Entre esas medidas estaría a suspensión de barreiras "técnicas e arancelarias" para favorecer o aprovisionamento de materia prima.
A este respecto, o presidente de Anfaco e da CEG sinalou que as posíbeis alternativas para a importación de aceite de xirasol ─Francia, Moldavia ou Bulgaria─ non reportarían unha produción suficiente para facer fronte á demanda da industria.
Neste senso, lembrou que, anualmente, o sector da conserva emprega 98.000 toneladas de aceites (44% das conservas empregan o de oliva, mentres que 56% restante elabóranse co de xirasol, do que 70% chega de Ucraína).
