A eólica mariña pon en perigo a actividade pesqueira en 184 caladoiros galegos

Os Plans de ordenación dos espazos Marítimos (POEM) aprobados polo Goberno do Estado delimitan cinco áreas na Galiza para a xeración de electricidade de orixe mariño. Neste sentido, reservan 2.350 km2 de augas galegas para o desenvolvemento de activades enerxéticas, coincidindo o seu emprazamento con áreas onde están documentados algúns dos caladoiros de pesca máis importantes do país. As confrarías analizan os riscos da eólica mariña para impugnar os POEM no Supremo A primeira destas zonas, denominada na planificación do Ministerio de Transición Ecolóxica (Miteco), NOR-1, ocupa unha extensión de 117 km2 e localízase a 22,3 quilómetros de Vigo e do Baixo Miño. Segundo sinala o Instituto Español de Oceanografía (IEO), organismo dependente do Consello Superior de Investigacións Científicas (CSIC), adscrito ao Ministerio de Ciencia e Innovación, o emprazamento nesta área dunha instalación eólica e os necesarios traballos de conexión afectarían 41 caladoiros de pesca. 50 buques do arrastre A área delimitada polo polígono NOR-1 destaca pola presenza de especies como o xurelo, o corriolo, o peixe sapo, o lirio, o camarón e o San Martiño. Neste caladoiro traballan embarcacións de toda Galiza, significándose artes como o cerco, artes menores e o arrastre. A este respecto, o voceiro da Plataforma en defensa da pesca e dos ecosistemas mariños, Torcuato Teixeira, apunta a Nós Diario que “nesta zona traballan 50 buques do arrastre, que desenvolven a actividade precisamente naquelas zonas de area e lodo onde se adoitan fixar os aeroxeradores flotantes”. A frota rexeita recibir compensacións pola eólica mariña: "O que queremos é traballar" A designada zona NOR-2 suma 1.086 km2 e é a área de reserva para a eólica mariña máis extensa do conxunto do Estado. Neste caso, emprázase fronte ás costas de Ortegal, Ferrolterra e A Coruña, localizándose a 48 km da Coruña, a 41 km da praia de Doniños en Ferrol e a menos de 30 km de Cariño e Cedeira. Precisamente, nesta área traballan embarcacións de toda a costa galega, desde Ribeira até Burela, así como buques procedentes de Asturias, Cantabria e Euskadi. O espazo signifícase pola presenza de pescada, ollomol e palometa. Asemade é unha das áreas de referencia para a captura do bonito, sendo lugar de pesca habitual dun importante segmento de frota do palangre, da volanta e das artes menores. Os propios promotores da única instalación eólica prevista até o momento para esta zona, as empresas madrileñas Bluefloat e Sener, que impulsan un parque de 1.200 MW, recoñecen no proxecto do mesmo que afectaría 51 caladoiros de pesca. Porén, os datos do IEO apuntan a un impacto en 67 caladoiros. A coordinadora 'Eólica, así non' mostra o seu rexeitamento ao Plan estatal de eólica mariña A zona NOR-3 ocupa unha extensión de 112 km2 fronte á costa Ártabra e de Ortegal. Precisamente, atópase a 23 km do cabo do mesmo nome, destacando por ser unha zona rica en especies pesqueiras como o xurelo, o corriolo, o peixe sapo ou o rapante. 30 caladoiros afectados A Plataforma en defensa da pesca, tomando como referencia os datos achegados polo IEO, denuncia que “a zona buscada para a súa localización e as zonas de cableado terían un impacto directo e indirecto sobre 30 caladoiros de pesca, e afectaría importantes especies como o xurelo, a xarda, o peixe sapo ou o rapante, entre outras especies de interese comercial coas que traballa a frota do caladoiro nacional do Cantábrico-Noroeste”. O polígono NOR-4, ao carón do NOR-3, emprázase fronte á zona de costa situada entre a ría de Ortigueira e a ría do Barqueiro, na comarca de Ortegal, e ocupa unha extensión de 77,7 km2. Neste caso, localízase a 22 km do cabo de Estaca de Bares, no concello de Mañón, unha das zonas de pesca máis importantes da Galiza, con significada presenza de embarcacións do país e de toda a área cantábrica. A CIG reivindica unha Galiza "libre de eólica mariña" polos "riscos" para a pesca O IEO certifica a existencia de 24 caladoiros na área delimitada polo polígono NOR-4. Neste liña, a Plataforma en defensa da pesca sinala, entre os caladoiros afectados, Campo de San Cibrao, Praia da Estaca, Petañón, Lombo da Estaca, Travesas, Gato Roido, Engaño, Favorita ou Potrero Terra. Precisamente, outras partes de Potrero, como Puntais de Potrero, Mar das sete curvas ou Saída de Potrero padecen o impacto de Nor-3. Impacto na pescada A zona NOR-5 sitúase na súa totalidade diante da costa da comarca da Mariña. A mesma, ocupa unha superficie de 236 km2, atopándose a 24 km do porto de Burela e a 32 da ría de Foz. Neste caso, trátase, tamén, dunha zona con importante actividade pesqueira, con 22 caladoiros recoñecidos polo IEO, entre os que se atopan algúns ben coñecidos como Cantil de Ribadeo, Praia de Ribadeo, Calvario do Oeste, Cemiterio, Campanario, Seco da Potra ou Pedra de San Cibrao. Iván López, presidente da Alianza Europea da Pesca de Fondo: "Hai unha colisión entre a pesca e a eólica mariña" A área delimitada destaca pola presenza de especies como o lirio, o xurelo, o bocarte, a sardiña, o bonito e a pescada, sendo unha zona onde logran unha gran relevancia os xuvenís deste peixe. Asemade, o caladoiro é traballado por relevantes segmentos da frota galega, destacando as dedicadas a artes como o palangre, o cerco, a volanta e as artes menores. Na mesma dirección, cífrase en 70 as embarcacións do arrastre con actividade no caladoiro. Defensa da Pesca mobilizarase hoxe na Coruña ante a Delegación do Goberno español exixindo a retirada dos POEM.