Dous informes marcarán a estratexia galega na pesca polo Brexit
O Consello Galego de Pesca mantivo esta terza feira unha reunión extraordinaria para abordar a folla de ruta en defensa dos intereses galegos diante da nova situación para o sector, unha vez consumada a saída do Reino Unido da Unión Europea.
A conselleira do Mar, Rosa Quintana, expuxo a estratexia no encontro, baseada en dous informes que a Xunta xa encargou sobre o impacto do acordo, un técnico-administrativo á Fundación MarInnLeg sobre a incidencia que terá na actividade extractiva e na comercialización dos produtos pesqueiros, e outro ao Instituto de Estudos Europeos Salvador de Madariaga da Universidade da Coruña sobre as súas implicacións xurídicas.
Unha vez estean dispoñíbeis estes informes, o Executivo galego convocará un novo pleno do Consello Galego de Pesca para analizalos e conformar un grupo de traballo no que estabelecer as prioridades do sector pesqueiro galego neste eido para os vindeiros exercicios.
Ao mesmo tempo, a Xunta solicitará unha reunión coa directora xeral de Asuntos Marítimos e Pesca (DG Mare) da Comisión Europea, Charlina Vitcheva, e co presidente da Comisión de Pesca do Parlamento Europeo, Pierre Karleskind, para trasladarlle o impacto que o acordo ten na Galiza.
O Consello Galego de Pesca consensuou unha actuación coordinada para facer fronte á incerteza xerada para a actividade da frota nos vindeiros anos e a perda de posibilidades de captura.
O Reino Unido non terá que aplicar redución
Na reunión informouse do impacto directo na frota galega e de que os buques británicos non se verán sometidos á Política Pesqueira Común nin a normativas como a obriga de desembarque. Ao mesmo tempo, o Reino Unido non terá que aplicar medidas de redución do esforzo pesqueiro para garantir a sustentabilidade dos recursos e incluso podería incrementar a súa frota posto que contará con máis cotas que en 2020 grazas a contar co 25% das posibilidades de pesca europeas cedidas polo Executivo comunitario.
O Consello Galego de Pesca extraordinario celebrado hoxe súmase ás reunións mantidas os pasados días 26 e 27 de decembro con representantes na Galiza da Alianza Pesqueira Europea (EUFA).
