venres 24/09/21

Clúster de Turismo de Galiza calcula que a crise pode destruír máis de 30.000 empregos no sector

Calcula que a pandemia pode provocar unha caída superior aos 2,48 millóns de euros nos beneficios.

 

Praia das Dornas, na Illa de Ons [Imaxe: turismo.gal]
Praia das Dornas, na Illa de Ons [Imaxe: turismo.gal]

Un estudo do Clúster de Turismo de Galiza (CTG) estimou que a crise sanitaria derivada da COVID-19 pode levar á perda de máis de 30.000 empregos no sector e un descenso do número de turistas superior aos 2,5 millóns .

Nun comunicado, a entidade detallou que elaborou este documento, que contempla catro escenarios distintos da evolución da crise, mediante documentos e previsións da Organización Mundial do Turismo (OMT), o Fondo Monetario Internacional (FMI), o Foro Económico de Galiza, a Mesa do Turismo, Exceltur, Bain & Company, Deloitte e McKinsey & Company, entre outros.

Así, calcula que a propagación da pandemia podería provocar perdas por valor de, no mínimo 2,48 millóns de euros a nivel galego. Así, espérase que se rexistre un descenso deo 33,2 por cento no Produto Interior Bruto (PIB) turístico da Galiza, así como dun 3,9 por cento no PIB galego.

Así mesmo, o informe elaborado polo clúster avanzou que se calcula que o número de visitantes reducirase 50 por cento, o que suporía unha caída superior aos 2,5 millóns.

Emprego

Como consecuencia, o estudo expón que esta situación xerará unha perda de entre o 22 e o 26 % do emprego do sector, o que representa a destrución de "entre 27.230 e 32.181 postos de traballo en Galiza".

Neste sentido, o presidente do CTG, Cesáreo Pardal, remarcou que o informe elaborouse de acordo coa situación actual do sector turístico en Galicia, que, segundo destacou, experimentará unha "retracción da demanda, unha crise económica e cambios normativos" cuxas consecuencias se coñecerán con posterioridade.

Por este motivo, o presidente do clúster incidiu na necesidade de que as administracións "sexan conscientes do peso do sector". Tamén remarcou a importancia de que se deseñe o calendario de desescalada de xeito que permita "mitigar no posible o impacto desta crise".

Imprimir

comentarios