O 'greenwashing' medra tamén no agro ecolóxico: "O consumidor está nunha xungla"

A práctica de mercadotecnia verde destinada a crear unha imaxe falsa de responsabilidade ecolóxica por parte das empresas, denominada co anglicismo greenwashing, está cada vez máis presente nas empresas. Ante este panorama a asociación que agrupa os comités e consellos de agricultura ecolóxica do Estado español, Intereco, xunto co Consello Regulador de Agricultura Ecolóxica da Galiza (Craega), realizaron esta cuarta feira unha xornada en Compostela co título 'Greenwashing. Ameaza ou realizade?' para dar visibilidade a esta problemática a nivel galego e europeo. A pesar de que non é unha práctica nova, o Craega asegura que o seu uso si aumentou nos últimos anos para satisfacer a demanda das consumidoras e consumidores que buscan produtos e servizos respectuosos co medio ambiente Malas e boas prácticas Entre as intervencións que se escoitaron na capital galega estivo a da experta en medio ambiente, sostibilidade e cambio climático, María Agrelo. “Hai unha desinformación evidente que coloca o consumidor nunha xungla na que non sabe cando lle están contando unha verdade ou cando unha mentira”, sinala en declaracións a Nós Diario. Na Galiza, esta profesional pon como exemplo de boa comunicación de produto, neste tema, a que realiza a empresa Casa Grande de Xanceda. “No envase dan instrucións claras de como este debe ser reciclado”, indica. No caso contrario situaría outro tipo de compañías de gran tamaño que realizan importantes investimentos publicitarios. “Está Inditex que ten unha comunicación confusa ou que pode levar a erro ao consumidor, como foi o que aconteceu coa etiqueta Join Life que empregou como sostíbel con criterios propios”, apunta. O grupo téxtil, actualmente presidido por Marta Ortega, anunciou o ano pasado que suprimía este indicador que foi impulsado a partir de 2015, segundo a multinacional “como ferramenta para sensibilizar os clientes e os equipos sobre a incorporación de materias primas e procesos que supoñen un menor impacto no medio ambiente”. Neste sentido a utilización da etiqueta Join Life medrara nos últimos anos, segundo a plataforma de información para as persoas profesionais da moda FashionNetwork.com, pasando de estar en 9% dos produtos en 2018 até 61% en 2022, ano en que Inditex logrou cifras récord ao alcanzar un aumento de 17,5% das vendas até os 32.569 millóns de euros. Dependentas de Inditex exixen melloras laborais na Coruña: "Non somos 'niñas' somos traballadoras" Outro caso que considera significativo é o de Endesa. "En 2018 era a responsábel de ao redor de 10% das emisións de CO2 de todo o Estado español e ao mesmo tempo foi patrocinadora do vixésimo quinto cumio do clima (COP25) en Madrid", sitúa como exemplo de greenwashing. "Para as campañas que queren dar este tipo de imaxe ás empresas, empréganse cores moi evidentes, como o verde, non prefixos como eco ou bio que si contan cunha normativa", explica María Agrelo que lembra a normativa que impide o seu emprego, "e isto é moi habitual reunilo coa palabra 'natural' e mesmo relacionalo cun territorio, como neste caso o galego", engade. O "lavado social" nas Administracións públicas Non só as empresas privadas realizan este tipo de prácticas, Outra das conferenciantes desta cuarta feira, a responsábel de proxectos internacionais e incidencia da Sociedade Española de Agricultura Ecolóxica (SEAE), Aina Calafat, aclara que vai máis alá. “As Administracións públicas, de maneira inconsciente, rematan por alimentar ese falso verde”, asegura a Nós Diario. Neste sentido, distingue entre o “lavado verde, que é moi coñecido”, e o “lavado social”. Ilustra este segundo concepto coa aplicación que se está a facer da Política Agraria Común (PAC). Pontón avanza un modelo enerxético "ao servizo da Galiza" e non ao de Endesa, Naturgy ou Iberdrola “Contribuíu a aumentar a fenda social no campo, e non o dicimos nós, tamén o propio Tribunal de Contas Europeo”, asegura. A razón desta situación é que as medidas comunitarias para o campo “están baseadas en superficie, quen máis ten máis recibe”. Con respecto á Galiza, traslada que o cálculo das Unidades de Traballo Agrario (UTA), tamén con indicadores de superficie, prexudica Galiza “por ser terra de explotacións de menor tamaño e diversificadas, con moita venda directa do seu produto, á hora de pedir axudas e mesmo permisos”. Aproveitarse do ecolóxico Desde o Craega aseguran que os esforzos desta maneira de “pseudoecoloxismo” varían. As tácticas publicitarias van desde mudar o nome ou a etiqueta dun produto en concreto para evocar o medio natural sen que variase o seu impacto ambiental ou sobre a saúde, até a realización tamén de grandes campañas publicitarias multimillonarias que retraten empresas altamente contaminantes como respectuosas coa natureza. A agricultura ecolóxica móvese na rede Un dos sinais de alerta que evidencia que unha organización está a realizar un 'ecobranqueo', apuntan, é observar as diferenzas de gasto. Unha proba disto é, sinalan, “cando se inviste significativamente máis diñeiro en anunciar ser verde que en prácticas realmente ecolóxicas”. Better Cotton publicará hoxe un informe contra Inditex Inditex, tras a acusación da ONG Earthsight de "prácticas ilegais" por parte de dous produtores brasileiros de algodón con estándar Better Cotton en terras situadas no Estado de Baía, no Brasil, reclamou "transparencia" e "rastrexabilidade" ao principal certificador de algodón da industria téxtil. A multinacional, a través dunha carta, considera que a información requirida "será chave para a valoración de posíbeis limitacións á consideración do estándar Better Cotton no noso sistema de aprovisionamento e, en particular, á potencial posta en marcha de iniciativas alternativas que conduzan a un maior control das condicións de produción do algodón con orixe Brasil". Denuncia en 2023 A denuncia da ONG data de agosto de 2023 e este mesmo ano debíanse coñecer os seus resultados. Better Cotton, entidade fundada en 2005 que se dedica á promoción de cultivos sostíbeis de algodón en contornas socialmente responsábeis, anunciou que hoxe dará a coñecer o resultado da súa investigación neste tema. A denuncia argumenta que provedores da multinacional teñen usurpado terras ademais de realizar deforestación ilegal e actos violentos contra as comunidades locais dese país americano.