A PREVIA | O Dépor procurará saír en Riazor da súa enésima crise
Dicir Deportivo e crise xa semella unha obviedade, pois son termos que van tan relacionados como coche e roda ou inverno e frío. Non gusta un de repetirse cando escribe, pero é que o conxunto herculino está instalado nunha alarma perpetua, polo menos, desde que Pablo Marí fallase aquel testarazo que puido darlle o regreso á Primeira División no play-off de 2019. Outros, como quen subscribe estas liñas, remóntanse moito máis atrás no tempo, até o descenso a Segunda no verán de 2011.
Pero veña de onde veña, o certo é que a derrota da pasada fin de semana ante a Cultural Leonesa deixou a formación branquiazul fóra dos postos de promoción e a dez puntos dun liderado que ocupa unha Ponferradina que visita Riazor o domingo ás 19 horas da tarde.
Nese encontro, como dicía Luís Aragonés, os locais non teñen máis opción que "gañar, gañar, gañar e volver gañar", porque todo o que non sexa iso, por arriscado que sexa realizar esta afirmación cando aínda restan 18 encontros para o final do campionato, equivalería a despedirse, canto menos, do ascenso directo.
Porén, o adestrador do Deportivo, un Imanol Idiakez rexeitado por boa parte da afección, considera que a Liga é "un maratón" e que "os que van sextos poden vencer", e non considera que o duelo ante a Ponferradina sexa unha "final", senón só "un partido moi importante".
Cun ollo posto neste encontro desde a outra punta da Península Ibérica, en Sabadell, onde xoga domingo ás 12 horas, estará o Celta Fortuna, sabedor de que se o Dépor raña canto menos un empate e el consigue vencer -como na serie Perdidos, aquí todo ten relación- a escuadra catalá dirixida polo ex técnico do Dépor, Óscar Cano, podería recuperaría o liderado da terceira categoría.
O Lugo e o Arenteiro, pola súa parte, teñen aspiracións máis modestas. Os albivermellos, que non saben o que é sumar de tres en tres desde que o inflamable Tino Saqués despedise Pedro Munitis nun rauto ás dúas da madrugada, necesitan recuperar esa senda desesperadamente ante o Nástic (domingo, 12 horas) senón queren perder un tren do play-off ao que aspira a engancharse o Arenteiro a costa dun Real Unión de Irún ao que visita ás 12 horas do domingo.
E se miramos arriba?
Quizais por non acabar de crer a súa situación de privilexio como segundo clasificado os seareiros e seareiras do Rácing de Ferrol adoitan mirar os equipos que os axexan na táboa e ignoran o líder, un Leganés -dato, que adestra outro ex deportivista, Borja Jiménez- que ten catro puntos sobre os Diaños Verdes.
Así que, a pregunta é, se consigue pasar por enriba do sempre complicado Real Oviedo o sábado ás 21 horas na Malata, poderá aspirar a alcanzar a cabeza da clasificación a próxima xornada? Todo depende do que faga o líder, que colide co Burgos xa na segunda feira ás 20.30 horas.
Problemas en Abegondo
Outro bloque que está na cabeza da táboa, no seu caso da Primeira Federación Feminina, é un Deportivo que esta fin de semana viaxa até Madrid para retar o filial do Atlético tan cedo como ás 12 horas do sábado.
A cuestión é que Irene Ferreras non poderá contar cun dos seus activos máis importantes, a xaponesa Ayaka Noguchi, que caeu vítima do mal endémico do fútbol feminino, as lesións nos ligamentos dos xeonllos.
Anticipo da Copa en Vigo
Xa na Primeira División, o Celta xogará o sábado coa Real Sociedade ás 21 horas en Balaídos un anticipo da eliminatoria de cuartos da Copa do Rei en Balaídos. A cuestión principal, ademais do morbo evidente, é se Benítez caerá da burra e optará, por fin, por darlle a titularidade a Douvikas.