O ourensán Iván Salgado, novo campión do Estado español de xadrez

Nas categorías inferiores, gañouno todo. En 2009 até foi subcampión do mundo sub-18. Agora acaba de se tornar no campión do Estado español de xadrez na categoría absoluta, no campionato realizado en Linares.

Iván Salgado
photo_camera Iván Salgado

Aos seus 22 anos, Iván Salgado, grande mestre internacional, é xa o número un do xadrez estatal, após se impor no torneo realizado en Linares a xogadores tan fortes como o grande mestre internacional Miguel Illescas.

A vitoria de Salgado sobre Illescas (47 anos, oito veces campión estatal) tivo un claro cheiro a cambio de garda, a relevo xeracional na cimeira.

O xadrecista galego non perdeu nen unha soa partida

O xadrecista galego obtivo o título após asinar táboas no último xogo disputado, co tamén moi novo David Antón, unha das grandes revelacións das últimas temporadas.

O grande mestre internacional ourensán mostrou un xogo moi solvente e até brillante por momentos, durante todo o campionato. Boa proba da súa solidez é que non cedeu nen unha soa derrota, o que lle permitiu totalizar 7,5 pontos, 0,5 máis que Illescas, quen se fixo co subcampionato.

Comentarios