Manolo García, adestrador da selección galega de fútbol: "Unha selección galega oficial? Non é descartábel nada a día de hoxe"

Manuel Ángel García Rodríguez (Ferrol, 1968), coñecido no mundo do fútbol como Manolo García, foi a persoa escollida pola Real Federación Galega de Fútbol (RFGF) para liderar o novo proxecto da Irmandiña na primeira fase estatal da Copa das Rexións da UEFA. En febreiro accedeu ao cargo de presidente do Comité Galego Adestradores e de director da Escola substituíndo Iván Cancela, agora presidente do Comité Nacional de Adestradores da Real Federación Española de Fútbol (RFEF). —Como recibiu o encargo de ser o responsábel do equipo técnico da selección galega de fútbol? Imaxino que para vostede e para o equipo técnico será todo un reto... No momento en que accedín a entrar na Federación unha das responsabilidades, ademais de ser o director da Escola de Adestradores, era ser seleccionador. Este reto é moi distinto ao que vivín até o de agora; non é a rutina do día a día dun equipo. Os xogadores veñen e non teñen moito tempo de falar, mais todos veñen con moita ilusión. Nunca sabemos se son a mellor representación da Terceira División... con todo, eu e todo o equipo técnico procuramos ver partidos en directo ou a través de vídeos para ter a máxima información. —Xa contou cunha primeira convocatoria de xogadores cos que adestrou a pasada semana. Que tivo en conta á hora de realizala? O principal impedimento que temos é que nós non podemos contar con ningún xogador que estea na Terceira División, onde nós miramos, que teña ficha profesional. Iso limítanos moitísimo. Por este motivo, por unha parte, miramos primeiro que sexan seleccionábeis. Despois temos en conta o estado de forma dos diferentes equipos e dos seus xogadores coa idea de aproveitar ese momento “doce” que poida ter cada un deles. Nas primeiras convocatorias traemos unha base que logo pode ir variando. —Facilitaron a convocatoria os clubs de Terceira? Si, até o de agora a verdade é que non temos queixa ningunha. Fixemos unha reunión con todos os adestradores da Terceira e tamén viñeron os presidentes para lles expor un pouco o que queriamos. Eles saben que temos comunicación directa, e se hai algún xogador que non está ben ou que ten algunha molestia, avisan. Para os clubs é un orgullo que un xogador do seu equipo poida vir á selección, E, pola nosa parte, nós coidámolos. —Falando de clubs, que opina do nivel actual do fútbol galego e da crecente aposta de moitos deles polas súas canteiras? Os resultados están aí presentes, partindo do Celta, que está en Primeira División e cunha gran cantidade de xogadores que ten no primeiro equipo que saíron precisamente da canteira. O Deportivo vaise animando cada vez máis ao ver que o traballo que se fai desde as categorías inferiores dá os seus froitos. "Nesta selección tratamos de ser un pouco o reflexo do que é o fútbol galego" Nesta selección tratamos de ser un pouco o reflexo do que é o fútbol galego. Desde que houbo esa división na Segunda B, con dúas categorías por enriba da Terceira, é posíbel que esta baixase un pouco o nivel. —Un exemplo é o Negreira, da Preferente e vén de disputar a primeira rolda da Copa do Rei... Si. Para eles, para ese equipo, ter a posibilidade de xogar cun equipo de Primeira División a Copa do Rei é algo que teñen que gozar, non pasa todos os anos. Ademais, é un apoio importantísimo a nivel económico para o club. —Xa ten o calendario na man e os primeiros rivais da Galiza serán Andalucía e Castela e León. Que opinión ten deles? Uf, aí si que se nos complica moito o asunto, xa que son seleccións novas. A Estamos centrados agora mesmo en nós por non termos moitos datos das outras seleccións. Con todo, teremos a oportunidade de ver o primeiro partido que xogarán antes Andalucía e Castela e León, mais non creo que teñamos moitas máis referencias. A pesar do incremento e da mellora das plataformas dixitais non é sinxelo conseguir ver partidos nesas categorías para facer un seguimento e poder ter os datos necesarios agora mesmo. —Que pedirá aos seus xogadores no campo? Só compromiso, nada máis. O resto é que veñan coa ilusión de facelo o mellor posíbel posto que precisamos do traballo de todos. Son dous partidos en dous días e, polo tanto, todos os convocados farán falta. "Aos xogadores só lles pido compromiso; precisámolos" —Que lle parecería que a selección galega participase en competicións oficiais da mesma maneira que o fan Gales ou Escocia? Sería outra maneira de concibir o fútbol europeo e o español. Non sei que nivel alcanzariamos, pero entendo que é unha reivindicación máis política que deportiva. Estou orgulloso de defender a selección galega e faría o posíbel para sacar o mellor resultado posíbel. Mais se algún día se dá haberá que ir con todo. Penso que nós temos que centrarnos a nivel deportivo. Logo, en función de como vaia a evolución política... haberá que agardar. Pero, ben, non é descartábel nada a día de hoxe. Galiza debutará o próximo 29 de novembro ante Andalucía A selección galega xa coñece os seus rivais para a primeira fase da Copa das Rexións da UEFA após o sorteo realizado na sede da RFEF en Las Rozas (Madrid). Os primeiros encontros serán o sábado 29 contra Andalucía e o domingo 30 contra Castela e León. Estes dous combinados abrirán o grupo da Galiza na sexta feira 28 de novembro. Nesta primeira fase clasificaranse oito equipos, que disputarán unha eliminatoria a partido único entre o 28 e o 29 de xaneiro. Os catro equipos que a superen xogarán polo título estatal do 27 de febreiro ao 1 de marzo. O último adestramento foi a pasada terza feira, no campo municipal de Gallamonde, en Miño (As Mariñas), e Manolo García citou Antón Pérez (Céltiga FC), Isra (CD Estradense), Carlos García (CA Arteixo), Diego Piña (Alondras CF), Lucas Camba (Alondras CF), Lombao (Arousa SC), Álex Suárez (Montañeiros), Juan de Dora (Montañeiros), Diego Enjamio (CD Boiro), Facu Moreyra (CD Boiro), Yosi (CD Boiro), Adrián González (CF Noia), Rachu (CF Noia), Xabi (CF Noia), Noel (CD O Barco), Andrer Bellido (CD Estradense), Brais Vidal (CD Estradense), Óscar López (CD Estradense), André (Gran Peña FC), Noel (Juventud Cambados), Make (RC Vilalbés), Cadra (RC Vilalbés), Pablo Trigo (RC Vilalbés) e mais Juan Cambón (UD Somozas).