Jessica Bouzas fai historia e deixa Wimbledon en oitavos

Jessica Bouzas chegou esta segunda feira a oitavos de final en Wimbledon e malia perder o seu partido ante a rusa Liudmila Samsonova 7-5 e 7-5 deixou clara a súa capacidade de superación. A tenista arousá xa é a primeira galega en chegar a esta rolda nun Grand Slam e fíxoo metida no partido en todo momento.

A pista 2 do mítico escenario inglés vibrou desde o inicio cando Bouzas se levou a primeira bola e o primeiro xogo, rachando co saque da rusa. 

A do Salnés soubo en todo momento da dificultade do reto de superar á número 19 do mundo, con abondo experiencia nestas eliminatorias e con títulos da WTA.

Con todo, Bouzas non dubidou en seguir na súa liña. Os dous sets de partido foron igualados. O primeiro cedeuno Bouzas após as dúas dobres faltas súas e a maior experiencia da rusa. 

Xa no segundo set as dúas xogadoras mantiveron o seu servizo, controlando os movementos da súa rival. Porén, a experiencia da rusa levou o premio de passr de rolda e continuar en Wimbledon. Con todo, após este resultado Bouzas sobre na clasificación WTA e a partir da vindeira segunda feira estará entre  as 50 mellores do mundo.