Ismael Martínez, adestrador do BM O Porriño: "Xogar en Europa foi unha experiencia marabillosa, traballaremos para voltar"

—Que o motivou a seguir no BM O Porriño unha tempada máis? O club tiña que comezar un proxecto novo e houbo que valorar moi ben quen era a persoa adecuada para esta nova etapa. Todas as partes decidimos isto. Houbo que buscar as motivacións adecuadas e agora comezo con moita ilusión para empezar algo novo, esperemos que igual de impresionante que o que deixamos atrás. —Recibiu ofertas doutros clubs? Puxo en dúbida nalgún momento a súa continuidade? Non recibiu ningunha proposta, en parte porque cando te asocian a un club non valoran esa opción. Nun futuro si que me formulo volver adestrar en balonmán masculino, por exemplo, ou participar noutros proxectos, mais é un futuro a medio-longo prazo. Agora mesmo estou encantado onde estou. Dúbidas sempre tes cando comezas un proxecto novo, porque tes que valorar que non é cousa dun ano, teste que ver nese lugar, non só nesta tempada, senón nun futuro máis longo. Mais estou moi contento coa decisión e con que o club siga contando comigo. —Como ve a evolución do equipo desde a súa chegada en 2019? Tiven tamén unha primeira etapa como segundo adestrador do primeiro equipo, polo que a miña visión é máis ampla que esta última etapa como primeiro adestrador. O crecemento foi exponencial, o ano pasado estivemos moi perto de gañar unha final europea e fixemos unha liga extraordinaria. A nivel de resultados, o crecemento é obvio. E, en canto a nivel estrutural, o salto que se deu nas bancadas é síntoma de que o club evoluciona. —Como foi a experiencia da tempada pasada? Como a viviu como adestrador? Foi un ano terribelmente duro a todos os niveis, fomos dobrando partidos desde xaneiro cunha plantilla moi curta e ao final creo que nos faltou un pouco de fondo. Como adestrador foi especialmente dura, con moita preparación de partidos, que practicamente se triplicaron por xogar en Europa... Foi, en parte, como ir en piloto automático, sen vivir o bonito que foi, que o valoras cando remata e xa te decatas de que foi unha experiencia marabillosa. —Esperaba chegar tan lonxe cando empezou a tempada? Volveremos ver o Porriño en competicións europeas? Desde o primeiro día propuxémonos xogar a competición europea para gañar. Ese era xa o noso grande obxectivo, chegar ás últimas rondas e gañar. E agora queremos volver, optar por méritos deportivos e intentar pelexar de novo por eses postos. Co cambio de proxecto pode que non sexa a tan curto prazo, mais si que aspiramos a volver estar onde estivemos. —Algún obxectivo máis a curto prazo para a tempada vindeira? Sempre digo que o obxectivo é encher o pavillón, e iso sucede cando xogamos partidos decisivos. É o principal obxectivo para esta tempada. A pasada non só o conseguimos, senón que houbo que ampliar a capacidade do pavillón, polo que sobrepasamos esa meta. Queremos volver ilusionar a nosa xente para que nos apoien e enchan as bancadas de novo. —E a que títulos diría que se postulan para conseguir iso? Imos competir na Copa da Raíña, que é algo que nos ilusiona especialmente porque é unha competición curta na que considero que temos moitas oportunidades. E despois a Liga, onde esperemos estar no play-off e logo gañar. Queremos intentar ser sempre competitivas e, logo, chegar até onde cheguemos. —Como afronta este 'cambio de ciclo'? Que expectativas hai sobre as últimas incorporacións? Coa ilusión de construír o novo grupo de xogadoras, de facer un modelo de xogo que nos defina, unha nova filosofía do club... As baixas son un proceso natural, é sorprendente que puidésemos soster este tipo de xogadoras tanto tempo, mais o seu crecemento foi incríbel e teñen que voar. Esperamos facelo tan ben con este novo equipo que non poidamos soster tampouco estas xogadoras. Os cambios non son malos, senón que deben intentar dar un avance maior. E seguramente non sexa a curto prazo, pero a medio creo que este grupo ten moito potencial. —Teñen xa programada a súa pretempada? Temos xa varios partidos, comezando co Bera Bera, un rival durísimo, nun torneo no que tamén participarán o Rocasa, Guardés e Braga. Iremos xogar ás contra o Rocasa, o Boden sueco e o Zonzamas, e temos partidos fechados en Valladolid co Aula e máis en Braga. E, ademais, a Copa Galiza, aínda que este ano será despois de empezar a Liga. "O apoio de toda a vila foi incríbel" Ismael Martínez leva desde o 2019 sendo o adestrador do BM O Porriño, club que quedou ás portas de gañar un título europeo o curso pasado, no que superou todas as expectativas, tamén na propia vila, até o feito de ter que remodelar o pavillón pola asistencia sen precedentes ás bancadas. "Vai ser difícil manter o apoio do ano pasado, mais sería marabilloso fidelizar tres cuartas partes da xente que estivo asistindo, porque o equipo vai competir ben", promete o técnico. O punto clave do apoio foi o éxito do equipo, mais "é innegábel que foi causa do papel excelente do Concello e do apoio da vila; foi incríbel", destaca. Tamén o apoio mediático "foi espectacular", afirma, destacando o crecente interese que esperta o seu club en particular e o balonmán feminino en xeral. "É para estar orgulloso, cando saes fóra dáste conta de que os medios locais son marabillosos", subliña.