Arxentina levanta o Mundial da hipocresía e a corrupción

Os chamamentos ao boicot ao "Mundial da vergoña" multiplicáronse no mundo libre días antes do comezo do torneo, hai algo máis dun mes, subindo a intensidade canto máis próxima estaba a cerimonia inaugural. Porén, e noutro claro exemplo de "fai o que eu diga e non o que eu faga", Occidente pegou a vista ás pantallas como unha mosca as patas nun doce prato de mel, como demostran uns índices de audiencia e cotas de pantalla que no Estado español superaron o 60% en determinados partidos .

A Copa do Mundo rematou, e o obxectivo de Qatar está conseguido. Lionel Messi, para non poucas persoas o mellor xogador de todos os tempos, levantaba aos ceos de Doha o trofeo ataviado cun besht, unha pintoresca prenda tradicional no país que está reservada á elite ou autoridades supremas do emirato.

Nese icónico momento, inmortalizado para sempre na historia do fútbol e da selección albiceleste, o escudo da Federación Arxentina, así como o da marca comercial que viste o combinado, permaneceu oculto, agochado, baixo as escuras cores do besht.

É moi posíbel que pasado o Mundial, as reivindicacións sobre os dereitos humanos en Qatar —un traballador chegou a morrer no hotel de concentración dun dos países participantes, Arabia Saudita, e o presidente do Comité Organizador respondeu "estamos en medio dun Mundial e isto é do que queres falar agora?"— esmorezan como a xeada cando lle dá o sol.

Neste sentido, a mellor nova sería que o descarado sportwashing levado a cabo por Qatar nesta Copa do Mundo, efectivamente, fique no esquecemento, e o de 2022 sexa recordado baixo unha óptica crítica, como acontece con certames como o da Arxentina videliana en 1978.

Messi gáñalle a batalla a Mbappé e entra no Olimpo

Con respecto ao eido estritamente deportivo, a Arxentina e Francia protagonizaron sobre o céspede do Estadio de Lusail unha -senón a mellor- das mellores finais na historia do certame.

A albiceleste impúxose desde a quenda de penaltis logo dun partido sen tregua na que chegou a estar 2-0 primeiro e 3-2 despois, pero un Mbappé en estado de graza marcou un hat-trick para manter con vida uns bleus que, pola contra, perderon desde os 11 metros, polo que Messi xa ten o seu Mundial e, por fin, pode sentar na mesa de Maradona por dereito propio.