No complexo deportivo de Gaifar, en Panxón, concello de Nigrán (comarca de Vigo) ten lugar un evento como poucos. Unha celebración da música e do seu acompañamento máis elemental: a percusión. Deste modo, volve outro ano máis o Apertuke, ou o que é o mesmo, o V Festival de Percusión Afrobrasileira organizado pola Asociación de Percusionistas e Tamborileir@s Aperta, que lanzan unha nova edición deste orixinal evento, que decorrerá os días 31 de agosto e 1 de setembro.
Durante eses dous días, terán lugar na cidade batucadas, ruadas, xogos infantís, talleres de percusión e danza e actuacións musicais, especialmente o sábado 31. Ese será o día grande do Apertuke, no que a diversión irá en aumento desde as 10.30 horas até as 3 horas, con actividades de balde, excepto o obradoiro de percusión, impartido por Miguel Moreno e Catherine Díaz, da asociación Mudarte, cun prezo de 25 euros.
Por outra parte, algunhas das propostas acústicas serán os grupos Sacha na Horta (23.25 horas) -gañadores do concurso 'A polo ghit' de Radio Galega e Vieiros e participantes noutros festivais como Antrospinos- e Cafuné (01.30 horas), que acode a chamada dos tambores desde Madrid para amosar o seu son ska e reggae. Malia todo, a nota diferencial será a artista drag Nenaza, que, desde o imaxinario mitolóxico galego, fará vibrar Nigrán coa súa sesión DJ e co seu proxecto performático.
Tras tanta esmorga, o domingo encarárase cun enfoque moito máis relaxado, cunha amena ruada pola paseo da praia de Panxón ás 13 horas, broche de ouro para tanto ritmo e tambor.
