Como cada sábado, Nós Diario trae entre as súas páxinas un novo número do semanario Sermos Galiza. As protagonistas deste número son Marilar Aleixandre e os xogos populares galegos. Aliás, coincidindo coas datas do nadal, ponse en valor a figura do Apalpador, da man de Ricardo Suárez. "A figura do Apalpador e o imaxinario do propio ser fantástico conecta coa tradición oral e concretamente co cantigueiro popular galego", explica Héitor Picallo para o semanario deste sábado.
O feminismo como cerna
Montse González trae unha entrevista á autora Marilar Aleixandre, que vén de gañar o Premio Nacional de Narrativa do Ministerio de Cultura con As malas mulleres (Galaxia), unha novela que recupera a memoria das mulleres presas da galera da Coruña e que foi galardoada tamén co Blanco Amor.
Aproveitando o galardón, Montse González conversa coa autora a respecto da súa extensa obra anterior e de como reflicte o feminismo que acompaña tempo atrás nas súas obras.
O xogo, unha ferramenta poderosa de aprendizaxe e socialización
Na primeira parte da edición deste sábado 24 de decembro, Mar Álvarez devólvenos á nenez nunha reportaxe que abarca a importancia dos xogos populares na Galiza. Nela constata que xogar non abrangue só ás crianzas, senón que é beneficioso para todas as idades.
O Apalpador, referencias á lendaria figura do nadal galego
Xa na segunda reportaxe deste novo número do Sermos Galiza, Ricardo Suárez achéganos esta importante figura do imaxinario mitolóxico galego. Como cada nadal o Apalpador abandona as montañas galegas e baixa ás casas das crianzas para controlar se están ben alimentadas e darlles castañas para encher as súas barrigas ou carbón para quecer a súa casa, ademáis de deixarlles algún agasallo.
Cine, teatro e literatura
Desta volta a opinión cinematográfica ofrécea o experto na materia Andrés Castro. Escribe a respecto do filme O corpo aberto, unha longametraxe de Ángeles Huerta na que participan Gaspar Broullón, Pepe Coira e Jorge Coira entre outros. O filme é unha adaptación dun dos dez relatos de Arraianos, obra cumio de Xosé Luís Méndez Ferrín.
Na sección de libros, por unha parte a análise de Tensi Xesteira a respecto do libro A culpa, de María Solar, obra galardoada co XXXIX Premio Xerais de Novela. Por outra parte, temos a opinión de Susana Sanches Arins sobre O gran libro da horta, unha proposta “que tanto podemos instalar na estante 574 como na 63 das nossas livrarias”, afirma.
No apartado musical, Herminio Gonzalez fálanos do disco A túa ausencia neste ar, de Fanny e Alexander, "Un novo álbum no que, como o mariñeiro embarcado, a emigrada retornada ou o exiliado político, voltan á casa na procura do que foron", tal e como eles o presentan. Tamén no apartado musical, Xurxo Souto repasa o xénero ‘Bravú’.
Por último, as dúas páxinas de pasatempos corren a conta de Xerardo R. Roca e Xoán Costa.