Queres saber algo máis sobre o Rexenera Fest?

O Rexenera Fest volve a Carballo e está a celebrar durante esta semana o seu décimo aniversario. A iniciativa mudou a vila converténdoa nun museo ao ar libre. Desde o 30 de maio e até este domingo 9 de xuño, Carballo é epicentro da arte urbana máis recoñecíbel: o muralismo. Organizado polo departamento de Promoción Económica e Turismo do Concello carballés, o Rexenera volve contar co apoio da Deputación da Coruña. Precisamente, o seu vicepresidente, Xosé Regueira —xa desde a primeira edición, máximo valedor do Rexenera, como titular da Concellaría de Turismo carballesa—, salienta "a aposta por un evento que leva dez anos dando cor ás medianeiras de Carballo e que está incluído na liña de subvencións da Deputación aos festivais de arte pública". Esta edición continúa coa súa idea de reunir artistas do país, como o galego Sr X, con outras brochas e esprays que xa están traballando nos muros da vila, como o caso de Amaia Arrazola, desde Catalunya; e Pablo Astrain, desde Euskal Herria. Onte mesmo chegaron tamén o suízo Stom500 e a portuguesa Tamara Alves. Un dos directores do festival, Javier Mourón, 'Mou', explica a Nós Diario que no festival seguen coa tónica do encontro de “espallar a arte urbana por Carballo” tras a experiencia do ano anterior de empregar, como espazo singular, o barrio da Lagoa. A revolución da arte urbana regresa a Carballo “Había interese por recuperar o lugar máis antigo da vila e foi unha experiencia moi especial pola proximidade que había entre os artistas”, afirma. No ano 2024 buscaron zonas “onde non había obras para que todo Carballo poida contar con estas intervencións”. Para escoller quen participa tiveron en conta “a disparidade tanto en técnicas como na mensaxe das obras, a linguaxe”, mesturando, sempre que se poida, “xente da vella escola con outra que fai cousas novas dentro desta arte urbana pública”. Mou recoñece que a experiencia de manter durante estes dez anos un evento destas características propiciou “que aparecera a mocidade e se enganchara”. Para fomentar este interese contan con xente nova que fai prácticas e que agora son muralistas. “Por exemplo Isa Bermúdez, que xa se introduciu neste mundo e ten varios encargos, acontece o mesmo nos lugares onde hai promoción desta arte, como é o caso de Ordes”, afirma oeste responsábel do festival carballés. Primeiros murais Os primeiros muros en traballarse no Rexenera Fest deste ano foron os de Amaia Orrazola e Pablo Astrain. Ela vén do mundo da publicidade e a ilustración, rematando desde 2010 en Barcelona onde ten o seu centro de operacións. Como o resto de artistas, estudou antes de chegar o seu muro e xa viña cun traballo xa preparado e debuxado. “O primeiro que fixen foi marcar puntos de referencia no propio muro, unha serie de marcas para logo pasar o meu debuxo á propia parede”, relata a Nós Diario. O proceso continúa “enchendo coas cores todos os ocos do debuxo” até rematalo. Nos seus traballos, tamén neste que iniciou en Carballo, aparecerá a súa faceta de ilustradora en varias publicacións polo que, admite, que o seu desde o inicio sempre foi o de “contar historias”. Sen dar a coñecer por completo como será, adianta que sairá na súa obra "Epona, a deusa celta da natureza e da fertilidade". Regueira avoga pola inclusión da arte urbana nos circuítos culturais Porén, o primeiro en chegar este ano a Carballo para participar no Rexenera Fest foi Pablo Astrain. Natural de Donosti, coñeceu de moi novo o graffiti e pasou polos estudos de Belas Artes na Universidade Pública Vasca. Din que a súa pintura ten unha característica pincelada solta e unha paleta escura que aborda temáticas e motivos que van desde o persoal até a actualidade social. Astrain explica a Nós Diario, sen revelar como será o seu muro unha vez rematado, que tentará "mudar esta idea, igual neste mesmo festival". Con todo, asegura que no mural que está pintando en Carballo a súa proposta xira "ao redor do nome e da exhibición, un xogo co espazo". Tivo con antelación información do lugar que agora está pintando a través de fotografías, mais apunta que "os muros sempre son complicados de mostrar de maneira frontal", algo que dificulta a preparación previa por traballar sempre, no seu caso, para facer o bosquexo "sempre emprego a foto do mural para garantir que coincidan as medidas". Astrain define a súa obra como "de estados de ánimo", sempre en relación estreita "coa contorna e o marco" que vai ocupar, mais "sen entrar en temas locais, dunha persoal". Descobre a Nós Diario que non leva ben as distraccións, habituais por outra parte cando se traballa na rúa, polo que prefire pintar "nas alturas" para evitalas. Rexenera Fest: Embelecendo Carballo con arte urbana Sr X, o muralista que chegou de Londres "Sempre está ben voltar á Galiza", asegura Sr X a Nós Diario. Como representante galego deste ano recoñece "certa responsabilidade" de pintar en Carballo. Este artista urbano afincado en Londres é unha figura referencial en Europa da arte urbana coa técnica do stencil, por este motivo chegou con plantillas para todo o muro. Comezou en Xixón (Asturias) hai quince anos e no Reino Unido, afirma, "o graffity está moito máis aceptado, sobre todo na percepción do público". Nesta aceptación a nivel mundial, apunta, "foron fundamentais encontros como este de Carballo". Actividades paralelas O Rexenera Fest inclúe, ademais, toda unha morea de actividades paralelas que comezaron o sábado cun obradoiro do Taller Trueno, impartido por Alba Vázquez e Kike Muñoz, que conseguiu esgotar todas as prazas. O 8 de xuño, durante todo o día, decorrerá outro impartido por Hanqo. Alén diso, e para non perderse detalle do Rexenera Fest, e saber máis da súa traxectoria e algunha que outra anécdota, comezaron as visitas guiadas que todos os días parten desde o Museo de Bergantiños para percorrer a vila. A organización, ademais, tivo en conta o público familiar e anunciou xogos de pistas que se realizarán á carta, segundo a data elixida polas persoas participantes, e cun premio sorpresa. O feche desta edición do festival urbano terá lugar o 9 de xuño a partir das 13 horas. O protagonismo, neste caso, será para a música do dúo coruñés Minifundistas que pinchará en vinilo pezas da súa colección.