A revolución da arte urbana regresa a Carballo

En Carballo a arte está na rúa. Este municipio da comarca de Bergantiños consolidou, cos anos, a proposta que iniciou en 2013 co proxecto ‘Derrubando muros con pintura’ e que espallou, a partir de 2015, a través dun festival: o Rexenera Fest. A receita puxo en práctica a proxección das novas canles de expresión da arte urbana presentes na vila aproveitando os espazos que deixou o seu deseño urbanístico. Contou, primeiro, con ingredientes locais para, despois, engadir cada vez máis nomes do panorama muralístico galego e internacional. Regueira avoga pola inclusión da arte urbana nos circuítos culturais Nesta novena edición, o departamento de Turismo de Carballo decidiu reunir sete artistas de procedencias diversas que, desde a pasada quinta feira e até o 11 de xuño, traballarán para revitalizar o barrio da Lagoa, o máis antigo da vila, así como o IES Parga Pondal. Un experimento de éxito O edil de Turismo e vicepresidente da Deputación da Coruña, Xosé Regueira, foi o responsábel de pór en marcha esta iniciativa no seu momento. Recoñece a Nós Diario que o proxecto de pintura en gran formato na vía pública pasou de ser “un experimento cultural, turístico e sociolóxico a ser un proxecto que lle dá identidade ao conxunto do concello”. Certifica esta realidade a inxente demanda de información que recibe todos os meses a Oficina Municipal de Turismo sobre a ruta para ver os murais de arte urbana. “O proxecto vai máis alá da administración, é un proxecto social onde unha parte moi importante da sociedade ve que beneficia as persoas”, asegura. Rexenera Fest: Embelecendo Carballo con arte urbana A idea de centrar o Rexenera Fest no barrio da Lagoa este ano non é nova. “Carballo medra dunha maneira exponencial durante o 'desarrollismo' do franquismo e non contamos cun casco histórico, mais A Lagoa non deixa de ser o 'casco vello' para nós, unha aldea no medio do municipio”, indica Regueira. MAZ, a aposta galega Na Lagoa (rúa Oriente, 1) está a aposta galega deste 2023: MAZ. Este vigués, residente no concello de Sober (Terra de Lemos), conta con estudos de Belas Artes realizados entre o Estado español, Portugal e Brasil. Iniciouse no graffiti en 2010 para pasar despois ás intervencións urbanas. A súa temática afonda no animalismo, na sostibilidade ou na propia sociedade desde unha ollada optimista. Para a súa intervención en Carballo, deseñou unha escena con dúas formigas que levan unha folla de papel por un camiño rural. “Procurei levar a ollada ao pequeno, un pouco da fantasía das fábulas”, explica, en conversa con Nós Diario, nun dos descansos que realiza estes días mentres transforma o muro dunha casa. Coñecía a vila e axudouse das novas tecnoloxías para estudar con anterioridade o lugar que lle tocou. A particularidade da súa obra, nesta ocasión, é que cada día "pola noite" escribirá un texto na "folla" do seu mural que borrará para escribir outra na xornada seguinte. Desta maneira o mural "mudará" mentres dure o festival. MAZ recoñece que en Carballo está “como na casa” ao coñecer moitas das persoas que participan na organización. “Interésanse moito pola parte artística, creativa e cultural, tamén son artistas”, apunta. "O Rexenera humaniza os espazos urbanos de Carballo deteriorados pola especulación dos 60" De México até Bruxelas A presenza internacional en Carballo comeza con Octavio Alegría e Ester del Prado, o dúo hispano-mexicano que traballa co nome de Alegría del Prado (rúa Sol 33 / rúa Carpinteiros) que introduce na vila bergantiñá un imaxinario a medio camiño entre a figuración e o naturalismo, un estilo cargado de detalles moi persoais cun fondo surrealista. Desde Sevilla, Alberto Montes (rúa Túnel) trae até Carballo unha obra singularizada pola investigación plástica con elementos de figuración e abstracción a través da concepción da paisaxe. Graduado en Belas Artes pola Universidade da súa cidade natal, ten participado en numerosas exposicións colectivas, así como en festivais. Esta pasada segunda feira comezaron as súas obras as tres artistas que completan o cartel deste Rexenera Fest. A deseñadora aragonesa Susana Blasco, tamén coñecida como Descalza (Rúa Oriente, 12), conta con mostrar a súa innovadora e característica técnica do collage aplicada ao formato mural. Pola súa parte, o artista belga Iota (rúa Oriente, 23) belga con base en Bruxelas, moverase con comodidade entre a arte mural, a pintura e o debuxo na última das intervencións muralísticas. Bota a andar o Rexenera Fest 2017 Por último, a única artista que leva a súa obra a outro ámbito é a ilustradora e muralista de Salamanca Elena González que intervén no centro educativo IES Parga Pondal da vila bergantiñá. A sensibilidade das artistas co lugar Asingularidade do Rexenera Fest está na convivencia de artistas e veciñanza. O festival non só muda a paisaxe urbana de Carballo cada ano, pois permite seguir en directo todo o proceso creativo que supón pintar un mural urbano. A veciñanza do municipio convive por unhas xornadas coas autoras e autores das obras que verán cada día no seu barrio. Ao mesmo tempo, tamén as persoas participantes no evento levarán a experiencia de coñecer e sensibilizarse co seu público.