Noite, baile e vangarda

Nos últimos anos multiplicáronse os exemplos de artistas galegos que introducen elementos de vangarda en cancións que seguen estruturas máis tradicionais. Unha proposta cuxa novidade se atopa na maior parte dos casos na fusión en si. Porén, resulta máis difícil escoitar propostas que aposten de maneira total e directa pola experimentación musical. Non resulta algo sorprendente, o novo sempre resulta máis arriscado, máis complicado facerse un oco nunha playlist de Spotify ou no cartel dun festival. Trátase en moitas ocasións de proxectos que escapan dos xéneros, a miúdo encadrado entre estilos tan diferentes como o ámbito e o techno, que noutros países de Europa acostuman a atopar un circuíto de espazos, salas e eventos para esta música así como toda unha cultura na que resulta habitual bailar ao ritmo da experimentación en directo, con festas que van máis alá das sesións DJ. Estes días celebrarase en Compostela un dos poucos festivais en Galicia que aposta de cheo por traer artistas que apostan pola vangarda, o WOS Festival, que acollerá tres decenas de concertos que reúnen músicos internacionais pero tamén galegos que merece a pena repasar. Resulta difícil escoitar propostas que aposten de maneira total e directa pola experimentación musical WOS Festival Entre eles Juait, que presentará por primeira vez en directo o seu segundo EP Bravo No Tramo, que verá a luz proximamente a través do selo PAC Records cargado de ritmos rotos británicos e elementos do techno, o trance ou o grime. O galego afincado en Barcelona Andrés Satué tamén se presentará baixo o novo alias de Kosu Nes. Recoñecido principalmente polo seu proxecto Huma, co que editaba en 2021 Hyperchaotic no destacado selo británico Opal Tapes, explora a converxencia entre ritmos tradicionais e a música electrónica contemporánea, xerando un son cru, intenso e enérxico que acompañará con proxeccións do artista visual galego Urok. Outro dos concertos destacados do festival será o de Transmutation, a nova colaboración do asturiano Alex Aller e a galega Margarida Mariño. Eles describen Transmutation como un conxunto de pezas orixinais compostas para electrónica e cello que xorde conceptualmente dunha reflexión arredor da morte e as posibilidades de transcendencia do aparentemente efémero da condición humana. De carácter marcadamente evocador e introspectivo, a música móvese entre xéneros coma o ambient, o ritual ou o neoclásico, tamén con proxeccións creadas pola artista visual Irene Sáenz e iluminación a cargo de José Faro. Tamén destaca no cartel a sesión de DJ da galega Acacia Ojea, Akazie, cunha proposta de deconstrución da electrónica bailable. Flux, en Vigo Ademais do WOS Festival, hai algúns outros eventos que permiten escoitar propostas similares en Galicia. Un deles é o ciclo Flux, organizado en Vigo polos irmáns xemelgos Nico e Héctor Iglesias, máis coñecidos como Yugen Kala. Trátase dunha iniciativa que, segundo eles mesmos explican, xurdiu por "necesidade" ante a dificultade de poder contar de maneira regular con este tipo de programación en Galicia e poder acceder a esta "cultura de club". Dende hai xa preto de dous anos, este ciclo comisariado polos dous irmáns trouxo a Vigo de maneira mensual artistas internacionais procedentes de todo o mundo e de selos recoñecidos como Hyperdub ou WARP, pero tamén deixaron oco para poder escoitar novas propostas de artistas galegos. O 22 de setembro teñen programada a súa edición número 25 na sala Mondo de Vigo, que contará con presentacións de música electrónica en directo do estadounidense afincado en Shanghai Osheyack e do compostelán 3SX3S0, así como dunha sesión DJ de Dømochevsky, colaborador de artistas como Arca, Grimes, Holly Herndon, Skrillex, Shapednoise ou Aho Ssan. Un dos atractivos das noites de Flux é que, nunha época na que predominan os eventos ao aire libre ou baixo grandes carpas en festivais, estas optan por celébranse no "hábitat natural" da música electrónica, os clubs, e en horario nocturno, aínda que a súa programación tamén ten cabida ocasionalmente para concertos máis habituais en horario de tarde, polo xeral na Sala Radar. No caso do WOS, este ano concentra a súa programación de clubbing nas naves da Fundación Laboral da Construción, un complexo arquitectónico con historia recuperada e reconvertida que servirá de pista de baile para o festival. O antigo curtidoiro de Pontepedriña de Arriba (O Avío) atópase xunto ás marxes do río Sarela. Durante as obras de rehabilitación preservouse a arquitectura típica, adaptando o patrimonio industrial aos seus novos propósitos.