A movida queda sen escenarios

Cando o colectivo Grupos en Loita tratou de dar o seu primeiro concerto en Vigo da man de varias bandas locais que reclamaban a reapertura das salas de ensaio municipais tras o peche pola pandemia atopouse cunha situación insólita. A Policía Local presentouse na sala na que se estaba a celebrar para suspendelo, evidenciando unha situación de inseguridade xurídica que viven boa parte das salas de Galicia ante as dificultades para conseguir ou adaptar as súas licencias, que chega a poñer en risco a celebración de concertos e mesmo a supervivencia dos locais. Segundo relataron dende Grupos en Loita, a Policía Local acudiu para cancelalo, se ben dende a plataforma expuxeron que "o concerto realizouse nunha sala perfectamente acondicionada e insonorizada, que de feito ten actividade constante ata as 4.30 da madrugada como discoteca". O argumento dado pola Policía Local foi precisamente a carencia por parte da sala dunha licencia específica de concertos, pero dende a plataforma explican que "esta é a situación da gran maioría de salas viguesas". Algo que permite, "na práctica, ter un recurso para poder paralizar discrecionalmente calquera concerto". Nova lexislación Unha situación de inseguridade xurídica que afecta tamén numerosas salas de concertos de Santiago, especialmente aquelas situadas na Zona Vella, que ante as dificultades de realizar obras para adaptar os seus espazos aos requirimentos legais para celebrar este tipo de actuacións, poden quedar sen licencia a pesar de contar cunha traxectoria histórica ofrecendo este tipo de espectáculos. En toda a provincia da Coruña, un informe elaborado pola Asociación Galega de Salas de Concertos, Clubtura, Clubtura e a Deputación, alertaba de que os concellos aínda non iniciaron a adaptación das súas ordenanzas municipais a novo catálogo da Lei de Espectáculos de Galicia e seguen sen concederse as licencias de salas de concertos, unha tipoloxía de establecemento recoñecida de forma legal por primeira vez nesta lei. A Xunta comezou a traballar nesta nova lexislación en 2018 e entrou en vigor en novembro de 2021, pero segundo explican dende a asociación Músicas ao Vivo "quedara pendente de facer o catálogo das licencias que modificaba as ordenanzas municipais. Agora, mesmo hai un problema importante porque cada Concello ten as súas licencias. Tratábase de intentar armonizalas, pero coa pandemia quedou en pausa". Así, salas de concertos coas mesmas características de espazo, capacidade ou insonorización atópanse en situacións distintas a nivel legal, provocando nalgúns casos que se cancelen concertos. O mesmo local, cos mesmos metros cadrados e insonorización pode non ter a mesma licencia na Coruña que en Vigo Concertos clausurados Esta situación pon en risco o futuro destes establecementos e, ao mesmo tempo, o dos artistas emerxentes que acostuman a actuar neles. A movida local das vilas e cidades galegas podería quedar sen escenarios. A actuación de Grupos en Loita non foi a única. En Vigo esta plataforma tamén denunciou os peches de concertos acústicos que a Policía realizou os pasados meses. Un deles no Al Traste Rock Bar de Rúa Torrecedeira, ás tres cancións de comezar o concerto acústico do grupo Other Game en sesión vermú, programado para as 12.30 do mediodía. Por outra banda, no Nuevo Bonus Track de Rúa Pi y Margall interior, a Policía tamén acudiu a deter un suposto concerto que non se estaba a producir. Este establecemento, que está insonorizado, sufrira a semana anterior a suspensión doutro concerto acústico. A pesar de que Galicia conta cunha nova Lei de Espectáculos, as licencias outórganse a nivel municipal. "O problema é que existen enormes diferenzas entre uns concellos e outros, temos máis de trescentos concellos con normativas e situacións diferentes", asegura a xerente de Clubtura, María Nieto. As ordenanzas acompañan esta nova lei, polo que "os Concellos teñen unha liberdade enorme coas súas ordenanzas para restrinxir a concesión de licencias, o que implica que o mesmo local, cos mesmos metros cadrados e insonorización pode non ter a mesma licencia na Coruña que en Vigo". Á hora de tratar de harmonizar todas estas ordenanzas locais, están a traballar tamén coa Federación Galega de Municipios e Provincias (Fegamp), pero Nieto explica que "non teñen capacidade legal de obriga" polo que "só se poden facer recomendacións". Ante esta situación avanzan que "iremos Concello a Concello". Nieto recoñece que "é complexo" sobre todo porque "hai Concellos cos que é máis fácil traballar que outros" e sinala que "non se trata só dunha cuestión política" xa que a aprobación deste tipo de normativas ten que ir avalada por funcionarios que "son máis ou menos propensos a elas".