Os Mestre Mateo de 'Hierro', Pedro Brandariz e Margarita Ledo

A serie de Jorge Coira foi a gran triunfadora da noite, na que ademais o intérprete recentemente falecido foi galardoado co premio á mellor interpretación masculina protagonista por Jacinto, a mellor longametraxe. Ademais, a académica recibiu o premio de honra Fernando Rey.

EuropaPress_4328515_foto_final_acto_entrega_premios_mestre_mateo
photo_camera Foto final cos premiados na XX edición dos Premios Mestre Mateo, na gala desenvolvida na Coruña (Foto: Nós Diario)

A serie Hierro, dirixida por Jorge Coira, foi a triunfadora da XX edición dos Premios Mestre Mateo cun total de seis galardóns, entre os que se atopa mellor serie de televisión e mellor dirección. Por detrás, a película Jacinto, con catro, e Tres con precisamente tres, entre os que se inclúe o recoñecemento a mellor longametraxe.

Hierro, que partía con oito candidaturas finalistas, non só conseguiu o premio de mellor serie e dirección, senón tamén de mellor guión, para Pepe Coira, Fran Araújo, Arancelo Gonda, Lidia Fraga e Eligio R. Montero; mellor montaxe, para Jorge Coira, Gaspar Broullón e

Juan Galiñanes; mellor música orixinal, para Elva Fernández e Xavi Font; e mellor dirección de produción para Ana Míguez.

Pola súa banda, Jacinto recibiu catro dos 11 premios aos que optaba: mellor dirección de arte, para Samuel Lema; mellor interpretación masculina protagonista para o recentemente falecido Pedro Brandariz; mellor maquillaxe e barbaría; e mellor vestiario, ambos para Lorena Calvo.

A terceira estrela da gala foi para a película Tres, que obtivo o último premio da noite: mellor longametraxe. Ademais, recolleu a estatuilla a mellor interpretación feminina protagonista, para Marta Nieto, e o de mellor son, para Daniel Fontrodona, Oriol Tarragó, Marx Bech e Marc Orts.

Pola súa banda, o que foi o gran triunfador da edición do ano pasado, Alfonso Zarauza coa película Ons, conseguiu este ano os galardóns de mellor interpretación de reparto para Diego Anudo e Iolanda Muíños en Melancolía.

Documental e TV

A parte dos múltiples recoñecementos que recibiron estas obras, os académicos premiaron a A Virxe Roxa como mellor documental e a iniciativa de CRTVG, #DígochoEu, coroouse como mellor programa e mellor comunicadora, para Esther Estévez Casado.

O premio a mellor anuncio publicitario recaeu en Redes vivas, de Metronoventa Creatividade e Produción Publicitaria; o de mellor videoclip foi para Figa, do grupo feminino Tanxugueiras e producido por Playplan e Trece Amarillo; e o de mellor curtametraxe foi para Augas abisais de Rebordelos.

En canto ao resto de premiados da noite, Jairo Igrexas obtivo mellor realización por Orixe; Lucía C. Pan a mellor dirección de fotografía por ¿Qué hicimos mal? e Mataría Microserie, de Dinamo Producións, gañou mellor serie web.

Durante a gala, a cineasta, xornalista, investigadora, poeta e escritora Margarita Ledo recibiu o premio de Honor Fernando Rey en recoñecemento á súa traxectoria "comprometida" coa reflexión, a creación, o feminismo e a lingua.

Representación institucional

Ademais do conselleiro de Cultura, Román Rodríguez, estiveron na gala a vicepresidenta segunda do Goberno español, Yolanda Díaz, e a alcaldesa da Coruña Inés Rey. Tamén, o director de Industrias Culturais, Jacobo Sutil, e o delegado territorial da Xunta na Coruña, Gonzalo Trenor.

No marco da celebración Rodríguez referiuse aos premios como unha "demostración do gran momento do audiovisual galego" e un "verdadeiro escaparate" do sector que lle dá "visibilidade" ao talento galego.

comentarios