Os mellores murais do mundo, en Fene

O Perla Mural Fest celebra a súa terceira edición nas rúas de Fene despois do grande éxito dos últimos dous anos. En 2023 e 2024 dous dos murais gañaron o premio ao mellor do mundo, outorgado pola plataforma internacional de arte urbana StreetArtCities. O galardón recibírono 'A violonchelista de Fene', de Sfhir, en 2023, e 'O charanguista andino', de Cristóbal Persona, en 2024 grazas ao voto popular. A alcaldesa de Fene, Sandra Permuy, salienta que “o Perla Mural Fest representa á perfección o que queremos para Fene: un concello dinámico, que aposta pola cultura e que se proxecta cara ao mundo desde a creación contemporánea”. O festival comezou a pasada segunda feira e rematará na xornada de domingo entre concertos, arte urbana e actividades orientadas á cativada. As xornadas musicais comezan hoxe coas actuacións de Sara Socas, Grex, Sarria, Hugo Guezeta e o grupo de funk rock O'Funk'illo, que celebra 25 anos de carreira co regreso dun dos membros fundadores, Andreas Lutz, e coa compaña de DJ Killian no seu novo proxecto musical: O'Funk'illo Soundsystem. 'A far l'amore comincia tu!', de Leitica Mandrágora. (Foto: Juanpa Ameneiros) Mañá ao mediodía haberá sesión vermú ás 12.30 horas con Pulpa e Superglú. Caendo a noite estarán, desde as 21 horas, Alison Darwin, Melifluo, Bernal, Drugos e Juanca Supersub DJ set a facer sinestesia coas cores dos murais a través da súa música. O DJ R4tibrón marcará as pausas e o feche desta noite, igual que o fará na xornada seguinte. No domingo rematará o festival con outra sesión vermú desde as 12.30 horas acompañada pola banda de rock Sintrom Ni Son e do cantante Litus. Os muralistas deste ano son Diego As, que intervén na Avenida Naturais 25, no centro de Fene; Wedo Goás na rúa Río Cádavo 9, na parroquia de Perlío, e David Barrera na Rúa Paralela a San Estevo 11, tamén en Perlío. Diego As realizando un dos murais. (Foto: Concello de Fene) Polas paredes derrubadas O Perla Mural Fest creouse en 2023 co obxectivo de facer homenaxe á antiga sala de cinema e baile Perla, que fora derrubada no ano 2005 para a contrución de 30 vivendas de uso privado. A sala foi creada en 1959 da man da familia Rivera, e durante o tempo que estivo aberta tiña un total de 350 butacas tapizadas e calefacción. A parte de salón de baile inaugurouse no ano 1963. O cinema Perla foi un dos sete que existiron en Fene durante o último século, mais que foron fechando as súas portas co paso dos anos. No ano 2007 ergueuse unha obra en homenaxe aos cinemas na propia praza que substituíu parte do Perla, creada polo artista Suso Basterrechea e que consta de sete cadeiras de bronce colocadas na praza. Vitoria entre polémica O concurso ao mellor mural do mundo, convocado pola plataforma StreetArtCities, recolle obras de graffiti arredor do planeta. Hai tres categorías anuais diferentes: a selección das e dos artistas, o foco das persoas expertas e o mellor mural do mundo. A plataforma tamén recolle mensualmente os mellores graffitis do mes por voto popular. StreetArtCities fundouse en Antuerpes no ano 2016 como un proxecto para a divulgación da arte pictórica urbana na cidade, mais foi crecendo radicalmente até chegar a máis de 600 cidades de todo o mundo a día de hoxe. O funcionamento dáse por particulares que toman o rol de "cazadores", e que fotografan murais e graffitis para publicalos na web como se "cazasen" as obras a través das cámaras. Un mapa interactivo mostra as localizacións destas pezas, mais a organización de StreetArtCities tamén se dedica a axudar a artistas a través do acceso a recursos materiais. No concurso do ano 2024 a organización sospeitaba de irregularidades no voto, e tras unha investigación por parte da plataforma as dúas pezas máis votadas polo público foron descalificadas do concurso. Finalmente 'O charanguista andino', do artista chileno Cristóbal Persona foi considerado o mellor do mundo de 2024. Este ano os murais que se pintarán en Fene son tamén candidatos ao concurso, aínda que as candidaturas non se fan desde a organización, senón por a iniciativa das e dos propios artistas. Desde o comezo do perla mural fest no ano 2023, Fene recibe excursións en autobús para visitar os murais feitos grazas ao traballo conxunto da organización e de artistas de todo o mundo Música en latas de spray A violonchelista de Fene, por Sfhir. (Foto: David Couce) As obras gañadoras dos últimos dous anos teñen unha grande orientación musical. A gañadora de 2023, 'A violonchelista de Fene', do muralista Sfhir, fai moito xogo co escenario da fachada pintada: o mastro do cello atravesa a parte lateral do edificio, onde se mostran as xanelas das escadas. Esta idea converte a obra en algo interactivo, pois cada vez que a veciñanza do edificio sobe ou baixa os chanzos fórmase unha curta melodía visual que acompaña diariamente a rutina da fachada. Sfhir é un creador de arte urbana provinte de Madrid, mais que deixou a súa pegada en Fene coa súa 'violonchelista' e tamén co mural que realizou o ano pasado titulado 'ANF10N', no que utiliza a forma do edificio para crear a lira da personaxe da mitoloxía grega Anfión, cun retrato del por detrás. A obra gañadora do ano pasado, 'O charanguista andino', expresa a tradición musical popular de Latinoamérica cunha vivacidade propia das obras de Cristóbal Persona, artista de Maipú, Chile. O realismo das súas pezas xunto coa xuxtaposición de elementos e a habilidade de facer xogo coas sombras fan de Persona un artista con gran presenza no sur do continente americano. ANF10N, por Sfhir (Foto: Juanpa Ameneiros) As crianzas tamén pintan Entre as 10.30 horas e as 13.30 horas de mañá e pasado, no recinto onde se realizan os concertos, o debuxante Carlos Sardiña impartirá un obradoiro de pintura urbana para a cativada. Titulado 'O meu primeiro mural', o obradoiro ten como obxectivo ensinar as bases do graffiti, e realizarase un mural debuxado por Sardiña que será pintado polas crianzas participantes, de entre 6 e 13 anos. A creación do Perla Mural Fest tamén provocou que a cativada de Fene collese gusto á arte urbana presente nesta vila de Ferrolterra. "Estamos tendo bastente influencia nas novas xeracións. Fan traballos de fin de curso sobre o festival e sobre os murais, fálase moito deles nas clases... Creo que estamos xerando bastante arte gráfica en todos os sentidos", sinala Fran Lage, un dos organizadores do festival.