Lamatumbá, o regreso máis agardado da década: "Xa nos tardaba!"

As viaxes importantes cómpre que se inicien desde un punto de partida acorda á aventura a emprender. E Lamatumbá, 12 anos despois, emprenden unha ben importante: a de volver percorrer os torreiros do país, e volverse xuntar con quen compartiron bailes, suor e festa naqueles días e, de paso, din, "saudar agarimosamente a xente que se fixo 'lamatumbeira' despois de que gardaramos os tarecos, alá polo 2011". A banda, integrada por Sergio Zearreta (voz e asubíos), Iván Varela (saxo), Benja (trompeta), Anxo 'Gafas' (saxo e clarinete), Bendaña (baixo), Toño Iglesias (guitarra), Rafa Ullán (guitarra eléctrica), Puntxa (percusión) e Txitxas (batería), subirá este sábado ao escenario da Sala Capitol de Compostela. "Xa fixeramos varios intentos 'post-churrasco' de volvernos xuntar, diciamos que estaría ben facerse un verán, tocar algún concertiño, volver ver a xente...", afirma a Nós Diario Toño, un dos integrantes da banda. Mais o detonante definitivo do retorno de Lamatumbá foi, curiosamente, a comedia galega Cuñados, estreada en cines no ano 2021. Nunha das escenas finais do filme dirixido por Toño López soa unha das cancións de Lamatumbá, 'Licorcafé'. "Xurdiu a idea de que se metera no filme música de Lamatumbá a conta dos fillos do produtor da película [Alfonso Blanco]. Foi moi gracioso. Eles decidiron, cos seus seis anos, aínda non naceran cando paramos de tocar, que sairamos nós na película", explica Toño. "Ao final unha cousa levou á outra e quixemos facer algún concerto aproveitando as estreas da película", engade. Porén, a chegada da pandemia da Covid-19 truncou este primeiro intento de retorno. As ganas de volver aos escenarios "quedaron aí" e, finalmente, neste 2023 aliñáronse os condicionantes: era un bo momento, a todos os integrantes lles apetecía, "e aquí estamos", di Toño. Así, este verán os e as fans de Lamatumbá poderán volver a escoitar esta banda tan senlleira da Galiza, cuxo son se caracteriza por mesturar diferentes estilos, abarcando desde a cumbia, o reggae, o ska, o pasodobre, até o rock ou o folk. Está por ver se o regreso é permanente ou, polo momento, só estival. "Non o sabemos. De momento a idea é ver como responde a xente, como se responde, que sensacións temos. Cando acabe o verán e cando acabe o ano, veremos o que pasa. De momento, non se descarta nada nin se confirma nada", afirma Toño a este xornal. A promotora do concerto de Guns N' Roses en Vigo denunciará o Concello Nova música En canto á posibilidade de escoitarmos música nova da banda, a resposta é semellante. "Iremos vendo como se vai desenvolvendo a cousa! Nin confirmamos nin desmentimos!", chancea o músico con Nós Diario. Nos torreiros da Galiza volverase escoitar neste verán o recoñecido 'Licorcafé', 'Lume', 'Watercumbia', o mítico 'París-Colombia', o 'Reggae dos mariñeiros', 'Dolores', entre outros grandes éxitos da banda galega, e a nova 'Xa nos tardaba!', unha canción que recolle o espírito deste retorno tan especial na música galega e que "moita xente" definiu xa como música de "Lamatumbá de toda a vida", coa crítica social e o ritmo pegadizo que os caracterizaba. O nome da banda foi, antes de que os seus integrantes acordaran facer "un descansiño para facer outras cousas", un referente musical no país e sinónimo de festa e de baile alí onde tocaban. A banda estrea nova canción co mesmo espírito "de toda a vida" "Estar de volta xunto a vós, ser outro máis nesta canción, facer de tripas corazón, sigo a caer na tentación, que fose vosa a miña voz, chegar a porto neste son, recuperar aquel furor, crer ou non crer, esa é a cuestión", di a nova canción, citando elementos que "xa lle tardaban" a Lamatumbá. Sobre este 'Xa nos tardaba", Toño afirma que "era o que nos dicía moita xente, que xa nos tardaba! Chamaban á oficina que nos levaba preguntando por nós varias veces ao ano... De feito foi fácil, dalgunha maneira, encher as datas do verán". E é que a banda tivo moi boa aceptación entre as organizacións das festas e dos festivais e xa ten varias datas confirmadas. "É unha sensación moi bonita saber que a xente se aleda de que regresemos. Iso tamén nos dá un 'plus' de ganas e de enerxía para meternos neste lío outra vez!", valora o guitarrista da banda. "É unha sensación moi bonita que a xente se alede de que volvamos" O Rabelo: "Todas as persoas queer con proxectos artísticos que coñezo están optando polo crowdfunding" Espazo "talismán" A primeira das datas confirmadas será en Santiago de Compostela. Porque un regreso tan agardado coma este tiña que ser obrigatoriamente nun sitio emblemático para moitas das bandas galegas e que os integrantes de Lamatumbá definen como "talismán". O grupo xuntarase de novo na compostelá Sala Capitol, "un lugar que tantas veces foi punto de partida de xiras, de presentacións de discos, e temos recordos moi bonitos de noites inesquecíbeis", sinala Toño. E, para que a celebración do retorno dos Lamatumbá sexa "máis grande aínda", quecerán o ambiente no escenario da Capitol TanDuB, descendentes directos de Lamatumbá. Un grupo que fusiona a música tradicional Gnawa (do norte de Marrocos) con outros xéneros como o reggae, o drum&amp;bass ou a electrónica, cun potente directo que reflicte esa mestizaxe de instrumentos de épocas tan distantes. É o complemento "perfecto" para unha noite, a deste sábado 17 de xuño, de reencontro entre músicos e fans na que "compartiremos con vós o son do noso camiño". Icía Varela: "Chámame a atención a aceptación que recibe a nosa música tradicional fóra da península" A axenda festivaleira de Lamatumbá busca colgar o cartel de completo O regreso de Lamatumbá era tan agardado polo sector do espectáculo musical da Galiza que á banda "non lle custou nada" cubrir as datas do verán con festas e festivais. Ao grande evento agardado para este sábado 17 de xuño, na Sala Capitol de Santiago de Compostela, Lamatumbá suma citas como o xa consagrado SonRías Baixas, que decorrerá do 3 ao 5 de agosto na localidade de Bueu (comarca do Morrazo). Nunha edición na que o festival morracense fai 20 anos, Lamatumbá comparte cartel con bandas galegas de renome como Grande Amore, Laura LaMontange &amp; PicoAmperio ou Ortiga, máis tamén con grupos internacionais como Naots y Waor, La Pegatina (cos que Lamatumbá colaboraron en numerosas ocasións), Boikot ou Dubioza Kolektiv, uns asíduos dos escenarios estivais. Lamatumbá tamén estará no Trece Roeis Fest, que decorre en Pantón (Terra de Lemos) o 18 e o 19 de agosto, con SFDK, Reincidentes, Lucía Aldao, TIAM Gz e Monoulious DOP, entre outros. E xa fechando a temporada estival, do 7 ao 10 de setembro, estarán en Vilaxoán (Vilagarcía de Arousa, o Salnés) na XIX edición do Festival Revenidas. Un evento no que non só regresan Lamatumbá, senón tamén Heredeiros da Crus, após un paro temporal motivado por cuestións de saúde do seu cantante, Javi Maneiro. Xunto a eles, tocarán Ska-P, Desakato, Zoo, Sara Hebe, Rodrigo Cuevas, Dakídarría, Fillas de Cassandra, Rebelióm do Inframundo e O Rabelo, entre moitos outros. Estas tres citas son só algunhas, e a banda agarda encher moitos máis torreiros do país. Verán en terra de festivais