Hora de asaltar o castelo: dous días de festa e revolta irmandiña
Con motivo da 28ª edición do Asalto ao Castelo, Vimianzo (Terra de Soneira) reaviva anos de historia e festa declarada de Interese Turístico da Galiza entre o sábado e o domingo.
Desde esta quinta feira e até o domingo ofrécense actividades de carácter familiar, educativo, histórico e musical. A apertura artística comezou esta quinta feira con especial protagonismo para os cativos na “Tarde noite infantil meiga”, ademais do “Aquelarre de Ánimas de Palleiro” e o “Des enterro Irmandiño”. Esta terza feira comeza oficialmente a festa coa cea medieval no foso —entradas esgotadas—, animada por Suso de Xornes e Lupe Blanco, a Cé Orquestra Pantasma e a queimada do druída Miguel Queiro; logo, os concertos de Che Sudaka, Monoulious DOP e La Yaya DJ inauguran a Noite Meiga.
O gran día é sábado. A Feira Artesanal e as actividades infantís (torneos medievais, xogos, artesanía en vivo, torneo de xadrez, obradoiros…) toman a praza do Concello e o Castelo. Máis tarde comezan os concertos nocturnos: a música tradicional de Alana, seguida de The Rapants, e o mítico “Asalto ao Castelo” coa queima, globos de auga, tambores, ariete e reconquista simbólica da fortaleza. Tras o asalto, seguen os concertos de Heredeiros da Crus, Firkin e Mekánika Rolling Band até a madrugada. O domingo fecharase con visitas guiadas e teatralizadas ao castelo e sesión vermú de Medio Quinhón.
A festa recrea as revoltas irmandiñas do século XV en clave de humor e participación cidadá: máis de 5.000 persoas únense ao asalto, os bares crean pinchos irmandiños e estabelécense zonas de acampada gratuíta sen reserva, no polígono deportivo e pavillón municipal.
