As actrices Isabel Risco e Marián Bañobre serán as encargadas de conducir o acto de entrega de premios María Casares da Asociación de Actores e Actrices de Galicia (AAAG) que se desenvolverá no Teatro Rosalía de Castro esta quinta feira 27 de marzo. Convertido o escenario nun “furancho” de “agroglamur”, as dúas actrices conducirán a cerimonia de entrega dos galardóns interpretando a dúas “furancheiras” tratarán de atopar “novas posibilidades para o seu negocio en tempos de crise”.
As xerras do furancho irán dar nalgúns dos once espectáculos que nesta edición compiten nas diversas categorías dos premios. “Para a situación do teatro é máis acaído celebrar unha festa nun furancho que unha gran celebración de glamuor pomposo”, destacou o director da gala, Santiago Cortegoso, de Iboprufeno Teatro, no acto de presentación. O fío condutor será, pois, o devir das dúas furancheiras para conseguir que o seu negocio prospere, metáfora escollida para reflectir a situación actual do teatro. O humor e a ironía serán algúns dos ingredientes desta particular gala que contará tamén coa música da banda Radio Cos, de Xurxo Fernandes e Quique Peón, acompañados por Pedro Lamas na gaita e saxo soprano, Nikolay Velikov no violín e Xan Pampín no acordeón.
Homenaxe a Pico
Durante a cerimonia de entrega dos premios, o escritor e xornalista Camilo Franco lerá o Manifesto do Día do Teatro e renderáselle homenaxe a Xosé Manuel Olveira Pico co Premio de Honra Marisa Soto.
Eurozone, de Chévere, é o espectáculo que acadou máis nomeamentos con 12 en total, seguida dos seis de O home almofada, con seis; os cinco de Bye Bye honey e As do Peixe, os catro de Waltz e os tres de A Charca inútil competirá por tres. C'est la vie, Criaturas, BailadELAS, Gaivotas subterráneas e As mil vidas de Matías Houseman optan por un dos premios do María Casares.
A gala será emitida en diferido ás 23.45 horas pola TVG, máis de tres horas despois do seu inicio ás 20.30 horas.