O FIOT de Carballo érguese contra a intolerancia

Vontade de crecemento e mellora. É o que vén mostrando o Festival Internacional Outono de Teatro de Carballo, o FIOT, desde os seus inicios. A presentación onte da 32ª edición demostrou que a cita que dirixe Alberto Sueiro, á fronte da Asociación Cultural Telón e Aparte, persiste no seu empeño de converterse na cita por excelencia do teatro na Galiza. O alcalde de Carballo, Evencio Ferrero; o conselleiro de Cultura, Román Rodríguez; a deputada de Cultura da Deputación da Coruña, Natividad González, e o director do FIOT e presidente da Asociación Cultural Telón e Aparte, Alberto Sueiro, presentaron onte o programa dunha edición vertebrada arredor da loita contra a intransixencia, un leit-motiv presente xa desde o cartel, deseñado pola ilustradora Laura Tova, que sintetiza a converxencia entre as diferentes artes, o feminismo, o apoio ao talento emerxente, a inclusión e o impulso da creación local. Voces singulares, compromiso social, diversidade de linguaxes... O programa do 32º FIOT conta con todas as liñas habituais que conforman cada ano o festival. Nomes galegos de referencia como os de Redrum Teatro, Diego Anido, Quico Cadaval, Roi Borallas, Antón Coucheiro, Soledad Felloza ou Caxoto mesturaranse con figuras fundamentais da escena estatal e internacional como Suzie Miller, Ariadna Gil, Andrés Lima, Paco Bezerra, Pepe Viyuela, Kikolas, Alberto Conejero, Xavier Bobés, Kulunka Teatro, Guillem Albà, Wilbur ou Aitziber Garmendia, nunha edición que abrirá, o 28 de setembro, Apaga o candil, espectáculo coproducido polo FIOT e Contraproducións, unha recreación da figura do singular contador de contos Carlos Díaz 'O Xestal' dirixida por Cándido Pazó. Os contos do Xestal están arraigados na tradición rural e visibilizan os problemas sociais desde a sátira, converténdoo nunha querida figura da cultura popular galega. Neste ano en que o Concello de Carballo declarou Ano do Xestal, o FIOT impulsa esta achega en forma de obra dramática. O Festival de Teatro de Carballo outorga á escritora Ana Romaní o premio 'xograresa de outono' Programa de Sala O principal escaparate do festival, o programa de sala, terá entre outros alicientes a versión que a compañía Redrum porá en escena, o 13 de outubro, de O pequeno poni, de Paco Bezerra, un dos dramaturgos máis suxerentes do panorama escénico estatal que, lamentabelmente, acaparou titulares por un caso de censura dunha das súas obras:, Muero porque no muero. Outro espectáculo tocado pola censura contra a que o FIOT se rebela é El mar. Visión de unos niños que no lo han visto nunca, de Alberto Conejero e Xavier Bobés, unha delicadísima montaxe que fala do poder transformador da escola a través da historia dun mestre fusilado tras o golpe de Estado dos fascistas. Dúas compañía vascas de traxectoria e calidade contrastadas tamén estarán presentes no FIOT: Kulunka Teatro presentará na Galiza, o 21 de outubro, Forever, unha demostración de mestría no teatro de máscaras; e Tanttaka Teatroa levarán a Carballo, o 14 de outubro, Sexpiertos, peza gañadora do Premio Max 2023 ao mellor labor de produción. Tanttaka chega a Carballo grazas á colaboración do festival co proxecto Vieiros, de Camiño Escena Norte. Tamén merecedora de atención será a triunfadora en Londres e Broadway Prima Facie, de Suzie Miller, na versión dirixida por Juan Carlos Fisher con Vicky Luengo como protagonista. El traje, unha comedia negra de Juan Cavestany interpretada por Luis Bermejo e o galego Javier Gutiérrez (15 de outubro), e a sorprendente Hay alguien en el bosque (29 de outubro), que recupera a memoria das violacións de mulleres e nenas como un arma de guerra no conflito de Bosnia e Herzegovina, nunha versión dirixida por Anna María Ricart e con Ariadna Gil encabezando o elenco completarán o programa de sala antes da clausura, o 31 de outubro, a cargo da shakespereana La comedia de los errores, dirixida polo ben coñecido na Galiza Andrés Lima. O FIOT, recoñecido como o mellor proxecto cultural da Galiza de 2022 Estrutura escénica O FIOT, porén, non se limita a exhibir espectáculos máis ou menos enxalzados por crítica e público. A sección OTNI (Obxecto teatral Non Identificado), dirixida a apoiar novos formatos e dramaturxias, contará este ano con montaxes de Guillem Albà -que trae ao FIOT a súa nova creación, Ma solitud, gañadora do Premio Fetén ao mellor espectáculo de pequeno formato este 2023-, o sempre sorprendente Diego Anido, Zum-Zum Teatre ou Os monicreques de Kukas. Tamén está presente a aposta por novos formatos e novas voces na sétima edición do certame Metro Cadrado, que propón obras site-especific. Canta nai, canta, de Cía IO; Ninguén tira fotos nos enterros, de Carlota Mosquera Rodríguez; DestilaPracer, de Espazo Vacío; O que é o raio, nin maldita idea, de Souvenir; Anaké?!Edipo en 15 minutos, de Contraditoria Compañía; e O mundo derrúbase e nós tomamos chocolate, de Mar Fiuza, son as pezas que farán parte da edición 2023. Por outra parte, a Rúa dos Contos é unha programación específica de narración oral que leva aos bares a figuras como Pepe Viyuela, Soledad Felloza, Bea Campos, Quico Cadaval ou Wilbur. E sen saír da rúa, o Teatro de Rúa visitará espectáculos de circo contemporáneo con Glamping, de SU.MA, e Duelo, de Jean Philippe Kikolas. Os máis novos tamén terán o seu oco no FIOT: o FIOTIÑO vén este ano da man do narrador infantil Caxoto. E o FIOTeen, dirixido ao público xuvenil, achegará o alumnado de secundaria a obras como Puños de harina, de El aedo teatro. Tamén o extrarradio terá protagonismo grazas ao FIOT en Ruta, que levará aos locais sociais de Oza e de Sofán, a Roi Borrallas -co seu Solo, Premio Fetén 2023 á mellor interpretación masculina- e da Compañía Humana -coa súa peza máis recente Iphixenia na porta do súper. A 7ª edición do Certame Metro Cadrado do FIOT de Carballo xa ten finalistas Motor de creación e de complicidades O FIOT tamén quere ser motor de creación dentro das artes escénicas galegas e, demóstrao, ademais de coa coprodución de Apaga o candil, en recordo da figura do Xestal, e do propio certame Metro Cadrado, co apoio á investigación e ao tecido emerxente coa residencia da coreógrafa e bailarina Clara Pampyn. Ademais, o FIOT23 tamén será espazo de encontro para públicos, compañías e axentes culturais, a través da organización de exposicións, xornadas profesionais, entrevistas, encontros e moitas outras actividades de mediación. O teatro galego loita pola estabilidade