Encontros da Imagem reúne en Portugal máis de 350 artistas: Argumentarios, disidencias e transicións na mostra que dirixe Vítor Nieves

Falar de Encontros da Imagem é mencionar un dos grandes festivais artísticos de Portugal, no que participan máis de 350 creadores e creadoras. Entre eles, destaca a representación galega en obras como a de Carlos Folgoso, coa exposición Alén do lago, no Espazo Circo; ou a reportaxe de Roberto de La Torre sobre os entroidos, que se exporá a pé de rúa. Nesta edición deuse unha viraxe no enfoque das exposicións. A través dun conxunto de vinte e catro curadores que, en palabras de Vítor Nieves (A Gudiña, 1980), director artístico da mostra, “pensan e protexen os artistas e as obras expostas, dialogan cos espazos e preocúpanse polo público”, os Encontros da Imagem deixan atrás case por completo as obras individuais e o contacto directo entre artistas e festival para formularse como un conxunto de exposicións colectivas coordenadas polos propios curadores. A temática deste 2025, 'Manifestação de interesse', pretende guiar o evento cara a un enfoque autorreferencial, revisando a súa traxectoria con intención de celebrala, mais achegando, tamén, un punto de autocrítica. Lémbrase que o principal obxectivo fundacional de Encontros da Imagem, tal e como sinala Vítor Nieves, foi o de outorgar un espazo á fotografía a nivel expositivo nun contexto (ano 1987) no que isto non era tan habitual. O concepto escollido para esta edición apóiase en tres puntos chave. O primeiro deles, argumentários, baixo a curatoría de Manuel Sendón, Xosé Lois Vásquez, Rita Castro Neves, Daniel Moreira, Rui Prata e Vítor Nieves. Nel, revísanse e rememóranse as historias de Encontros da imagem e outros festivais da fotografía portuguesa. Exemplo deste eixo é a exposición na que participa o colectivo Barda, que compila e rememora as súas experiencias nos festivais dos que formaron parte. No caso do segundo, dissidências, que dirixen Elina Heikka, José Bacelar e Vítor Nieves, participan artistas como Helena Almeida & Inês Moura, xerando un diálogo “improbábel” entre a obra dunha artista recoñecida e xa falecida e unha artista na metade da súa carreira. Os diálogos interxeracionais forman parte deste eixo temático, no que se abranguen prácticas máis aló do tradicional, dentro dunha interpretación máis inclusiva da fotografía. Por último, contan con transições, con curadoría do propio Vítor Nieves e Daniel Bastos. Este punto foi pensado para a celebración da rexión do Minho, na que o festival se celebra, apreciando a contorna de Braga, a etnografía e as novas contornas rurais. Entre outras temáticas, trata as migracións, incluíndo, desde imaxes de arquivo histórico, até voces actuais, narrando experiencias como ser brasileiro e vivir en Portugal. Encontros de Imagem é, facendo honra ao seu nome, un punto de encontro de fotógrafas e fotógrafos consolidados con outros emerxentes, tanto no plano nacional como o internacional, conformando un espazo para a innovación, a creatividade e a crítica. De feito, un dos factores a destacar do festival é que se achega á arte desde distintas disciplinas, sendo a principal a fotografía, mais abranguendo tamén formatos como o cine, a performance ou o video-arte. Especialmente nesta edición de 2025, na que haberá unha presenza importante de obxectos artísticos como poden ser esculturas ou instalacións, que fomentan a interconexión entre a fotografía e outras disciplinas artísticas, de forma que se produzan experiencias “novas e irrepetíbeis” para o público. Tampouco se limita a un lugar de exposición, senón que, con Braga como centro, as súas actividades inauguraranse en distintos puntos da parte norte de Portugal. Así, neste 2025, o festival contará con inauguracións en localidades como Porto (20 de setembro e 25 de outubro), Barcelos (25 de setembro), Braga (do 18 ao 20 de setembro) ou Vila Nova de Gaia (4 de outubro). Circuíto artístico O labor de Encontros de Imagem para o circuíto artístico portugués vai alén do amplo abano de obra e creadores que se expoñen. O festival ten intención de dar oportunidades a artistas emerxentes, incluíndo, dentro da entrega de premios anual que organiza, a categoría de novos talentos, na que o gañador expón de forma individual na seguinte edición. Aliás, o evento achégase aos espazos a través da arte, coa organización de simposios, ciclos de cine, lectura de portfolios, residencias artísticas e outras actividades no ámbito educativo. Na liña do anterior, hai, nesta edición, un especial interese en mediar entre a arte do festival e a comunidade local, tratando de empregar unha linguaxe que chegue a elas, eliminando as restricións de público nos actos e mais recuperando o portugués como lingua vehicular -mantendo, porén, as traducións a inglés pola dimensión internacional do festival-. En resumo, Encontros da Imagem une diversas miradas sobre a fotografía, dinamizando a rexión do Minho, nomeadamente Braga, atraendo miradas, talento e nova vida ás rúas. Unha mostra dos 40 anos de fotografía luso-galaica Unha das exposicións centrais do ciclo é 40 anos de festivais. Uma possível história da fotografia luso-galaica. De autoría galega e portuguesa, é unha colaboración entre Manuel Sendón, Xosé Lois Suárez Canal (directores e creadores da Fotobienal de Vigo), Xosé Lois Vázquez (director do Outono fotográfico de Ourense) e Rui Prata (cofundador e ex director dos Encontros da Imagem). Trátase dunha exposición esencialmente historiográfica, que explora o arquivo dos festivais mencionados. A través da revisión da súa traxectoria, pon de manifesto a historia común da fotografía luso-galaica. Deste modo, pódese observar a importancia que tiveron a Fotobienal, o Outono Fotográfico e os Encontros da Imagem para a dinamización da fotografía contemporánea na Galiza e en Portugal, sucesivamente. Ademais, esta exposición pon sobre a mesa a influencia mutua dada ao longo dos anos entre os tres festivais, debido, entre outros factores, á proximidade xeográfica, que tivo como consecuencia a inclusión común de artistas nos carteis en diferentes ocasións. Esta homenaxe á historia dos festivais estará dispoñíbel desde este sábado ao 2 de novembro no Mosteiro de Tibães, Braga.