A cultura galega únese nunha gala solidaria en apoio ao pobo palestino fronte á barbarie

"Se ti non estás ao lado do teu irmán, do próximo, quen vai estar ao teu carón?". Con esta pregunta, a cantora e compositora galega de pai palestino Najla Shami anima, en conversa con Nós Diario, a participar da gala solidaria que este domingo acolle ás 20 horas o Pazo da Cultura de Pontevedra en apoio ao pobo de Palestina. A artista é clara: "Hai que contar a verdade das cousas. A historia sempre está escrita polos vencedores. A situación de Palestina non é algo novo. Estase a falar dela nestes momentos polo grao de violencia ao que está a chegar Israel. Agora comezan a caer as máscaras. Estase a ver como os poderes económicos son suficientes para facer calar países enteiros". No marco do xenocidio israelí ao pobo paslestino, as asociacións culturais Pallasos en Rebeldía e Culturativa organizan coa colaboración da Asociación Galiza por Palestina e do Concello de Pontevedra unha gala solidaria a prol das palestinas e dos palestinos. A principal meta do acto é a xuntanza de fondos para axudar a poboación palestina, mais tamén a reivindicación da fin do masacre a través da arte. "Se existe un inferno na Terra é o norte de Gaza": Israel intensifica o xenocidio en Palestina con ataques a hospitais "Todas e todos podemos actuar e abandonar o noso rol pasivo, o único que se precisa é actitude. Calquera persoa pode realizar un cambio. Todas temos a capacidade de facer algún movemento revolucionario a través da creatividade en calquera sector da nosa vida que nos emocione. Se tes conciencia, usarás isto para crear unha sociedade mellor", sinala Najla Shami. "Só se precisa actitude. Calquera pode axudar ao cambio", di Shami Melania Cruz presenta unha gala que "oxalá non fose" A gala solidaria será presentada pola actriz Melania Cruz, que afirma en declaracións a este xornal que "oxalá non a tivese que presentar, porque iso querería dicir que non está tendo lugar o conflito que estamos a ver". A recoñecida actriz confesa sentirse "frustrada" coa actuación dos órganos institucionais: "Vemos que os Gobernos non están movendo un dedo para que isto mude. Non sei que clase de intereses económicos ou doutro estilo están xogando por detrás para que esta situación de xenocidio non sexa parada. Isto é terríbel, é inasumíbel". Peón, Nuno, Shami, Prado, Muerdo, Teto, Castelli No evento actuarán, de maneira solidaria e desinteresada, artistas galegas de distintos ámbitos. Subiranse ao escenario do Pazo de Cultura, un local con capacidade para acoller 750 persoas de público, Mercedes Peón, Grande Amore, Najla Shami, Muerdo, o Mago Teto, Rossina Castelli e, o coordinador da gala solidaria, Iván Prado. Un dos artistas convidados, Nuno Pico, 'Grande Amore', asegura que desde o primeiro momento que lle fixeron a proposta tiña claro que quería participar nunha iniciativa tan "necesaria" como esta. O cantante tamén fai fincapé no "carácter dramático" dos acontecementos que están a ter lugar na Faixa de Gaza e asevera que todo o que se poida facer para colaborar, aínda que pareza pouco, é necesario: "A nosa maneira de aportar o noso gran de area é coa nosa música. Mais hai que ser conscientes de que as institucións que están moi por enriba de nós son as que teñen que pór toda a carne no espeto". A artista Mercedes Peón non dubidou en participar do evento. En declaracións a este xornal sinala: “Na Palestina levan acontecendo cousas tremendas desde hai décadas e décadas. Chamáronme para a gala e non tiven dúbida ningunha en dicir que si, que participaba. É terríbel a cantidade de mortes e xa non digamos de meniñas e meniños. Hai que pensar nas persoas desde o lugar máis amoroso que unha poida e non quedar no sofá. Como europea, paréceme unha vergoña que Europa non faga máis forza e que non se consiga un diálogo”. De costas á realidade "Deberían existir galas solidarias como esta os sete días da semana. Non só a prol do pobo palestino, senón a favor de todas as vítimas deste tipo de barbaridades que suceden cada día no noso mundo, como é o caso de Sudán ou o Iemen", reflexiona Najla Shami. A cantora agradece o labor da entidade organizadora da gala, Pallasos en Rebeldía: "É xente comprometida, non só con Palestina senón coa sociedade en xeral". Galiza volverá saír á rúa en apoio ao pobo palestino. Eis as 11 novas mobilizacións para a vindeira semana Pallasos en Rebeldía e o fío con Palestina Esta asociación cultural e de cooperación internacional ten unha ligazón moi profunda co pobo palestino e coa súa causa. De feito, o bautizo desta organización foi na Faixa de Gaza. Grazas aos organizadores do Festival Internacional de Clown de Festiclow, que decidiron hai máis de dez anos utilizar os fondos recadados para enviar tres paiasos a Palestina nace a iniciativa. Desde entón, Pallasos en Rebeldía leva moitos anos construíndo relacións artísticas con distintos territorios de Palestina a través do circo. Pallasos en Rebeldía volve a Palestina: "O riso é un dereito de todos" Desde a asociación cultural aseguran que seguirán organizando galas solidarias e eventos para axudar no que poidan aos palestinos e ás palestinas, pois "soñan cunha Palestina libre, sen unha ocupación xenocida" e esperan que se poña fin ao masacre. A entrada da gala solidaria será de balde, mais haberá billeteira inversa, é dicir, ao finalizar o evento o público asistente poderá realizar unha doazón da contía que desexen. A integridade dos fondos recadados irá destinada ao pobo palestino. Para asistir ao evento, que terá lugar este domingo ás 20 horas no Pazo da Cultura de Pontevedra, é preciso inscribirse na páxina web Inscribirme.com. Outra maneira de anotarse é chamando ao número 981582836. Poderán realizarse as inscricións ata completar a capacidade do recinto. Unha gala para "coidarnos" e soñar o mundo xusto que queremos avistar Iván Prado, portavoz de Pallasos en Rebeldía e fundador de Culturativa, é o coordinador e creador deste evento solidario. En declaracións a este xornal explica que "estas galas son unha forma de acollernos, coidarnos e querernos. Son unha maneira de compartir a rabia, a dor e o desexo de que o masacre acabe. Son para soñar o mundo que queremos avistar". Por outro lado, Iván Prado asegura que con este evento cultural buscan xerar un espazo que permita ás artistas galegas expresar a súa solidariedade con Palestina a través da música e do humor. "A música é como unha gran vela dun barco pirata que nos axuda a chegar ao noso destino e o clown e o circo é esa tripulación do barco que intenta xerar entusiasmo, ilusión e alegría". Desde Pallasos en Rebeldía condenan a matanza en Palestina e piden ás institucións que poñan fin á dramática situación. Vén de participar ademais nunha rolda de prensa xunto a Demetrio Gómez, edil de Cultura do Concello de Pontevedra. O concelleiro nacionalista afirmou estar "orgulloso" desta iniciativa e declarou que "un acto como este, que se celebre nas nosas instalacións, fainos parte dun pobo que é quen de pórse en pé diante dunha inxustiza que se está a producir". Gómez móstrase crítico coa situación que está a vivir o pobo palestino: "Nada xustifica unha carnizaría como esta. Non hai atentado, nin grupo terrorista, nada que xustifique o asasinato de 5.000 nenos e nenas". Pontevedra acollerá unha Gala Solidaria con Palestina Iván Prado recoñece estar "moi contento" de anunciar en Pontevedra a primeira de varias galas que irán facendo nos próximos meses tamén polo Estado español e agradece ao Concello de Pontevedra a súa colaboración.