Centos de actos de homenaxe no Día de Rosalía revalorizan a súa figura e a súa obra

Devoción popular. A xornada de onte demostrou o respecto e admiración que o pobo galego sente pola figura e a obra de Rosalía de Castro. Centos de actos de todo tipo celebraron o Día de Rosalía por toda a xeografía do país, conmemorando a data de nacemento da poeta nacional. Fixérono desde primeira hora, na alborada convocada pola Fundación Rosalía de Castro na estatua da autora en Padrón, un acto que se repetiu unha hora despois, na Praza de Vigo de Compostela, perto de onde se levantaba a Casa da Parra, na que naceu a poeta. A seguir, tivo lugar o acto institucional que habitualmente decorre no Hostal dos Reis Católicos. Alí, autoridades e figuras destacadas da esfera cultural como o presidente da Real Academia Galega, Víctor F. Freixanes, ou a presidenta do Consello da Cultura Galega, Rosario Álvarez, deron voz a "Tecín soia", ao prólogo de Follas Novas ou a "Máis o que ben quixo un día", entre outros textos da autora. Xa pola tarde, na sede da Fundación, degustouse o Caldo de Gloria, realizado segundo a receita que a poeta describe no poema "Miña casiña, meu lar" e que, nos últimos anos, se converteu nun elemento tradicional desta conmemoración. De feito, máis de 400 locais de hostalaría de distintos concellos uníronse a esta proposta. O papel da AELG A celebración do Día de Rosalía débelle moito á Asociación de Escritoras e Escritores en Lingua Galega (AELG), que, despois dun acto de homenaxe no 125º aniversario do pasamento da autora que supuxo andar de novo o camiño dos que trasladaron o corpo de Rosalía desde o pé da rosaliana Casa da Matanza até a igrexa do convento de San Domingos de Bonaval (Compostela), logrou que miles de persoas de persoas e ducias de asociacións apoiasen unha iniciativa que buscaba redignificar a figura de Rosalía. Malia que o acto principal da AELG decorrerá o sábado 25 -unha ofrenda floral diante da tumba de Rosalía no Panteón dos Galegos Ilustres-, o seu traballo estivo presente en ducias de actos nos que se leu o manifesto que todos os anos encarga a asociación, desta vez á filósofa e ensaísta Carme Adán. En Vigo, por exemplo, as poetas Marta Dacosta e Cruz Martínez deron lectura ao texto de Adán na xa tradicional ofrenda que a AELG e a Asociación Cultural O Castro organizan onde se atopaba a imprenta de Juan Compañel, na que se imprimiu, en 1863, a primeira edición de Cantares Gallegos. Máis de 45.000 'Caldos de Gloria' para Rosalía As institucións prolongan a celebración O Goberno galego conmemora durante todo o mes a efeméride, a través a través da Rede de Bibliotecas Públicas da Galiza, dos Centros de Estudos Galegos ou dos Equipos de Dinamización da Lingua Galega dos distintos centros escolares. Tamén a Deputación de Pontevedra alonga durante dous días as celebracións, con lecturas do manifesto da AELG, en Pontevedra (onte) e Vigo (hoxe), acompañadas dun espectáculo multidisciplinar no que participan o ilustrador Marcos Escudero, a poeta Alba Cid e a arpista Alba Barreiro. Os museos dependentes da Deputación de Lugo agasallaron as visitas cun caravel e unha lámina conmemorativa cun deseño da ilustradora Ana Santiso inspirado no poema “A xustiza pola man” de Follas Novas. E a Deputación da Coruña, en colaboración co Concello de Santiago, resérvase para a fin de semana, coa celebración do Festival Rosalía 2023, dúas xornadas cun amplo programa de actividades que celebran a figura da propia Rosalía, "como autora e poeta, máis tamén como referente feminista, e botando man das nosas creadoras actuais". O Festival Rosalía volta a Compostela con dous días de actividades Máis alá do institucional Mais como sucede con todas as manifestacións populares, a inventiva soborda os límites do institucional e dá paso á imaxinación: en Ponteareas, por exemplo, o comercio local repartiu entre os compradores bolsas con versos de Cantares Gallegos; unha iniciativa semellante levaron adiante as panadarías do concello de Melide, que entregaron onte o pan en bolsas con poemas de Rosalía; en Carballo, anunciouse a apertura dun xardín inspirado no poema "Adios ríos, adios fontes", cedido polo Concello de Allariz, onde fora seleccionado no Festival Internacional de Xardíns; o castelo de Soutomaior mostraba orgulloso o seu exemplar da variedade de camelia 'Rosalía de Castro', de orixe portuguesa; Pontevedra organizou unha xornada astronómica de observación da estrela Rosalía de Castro, igual que o Planetario da Casa das Ciencias que dedicou uns minutos, en todas a súas sesións, a ensinar a localizar no ceo o astro; Outes pintou un mural conmemorativo no que colaborou o alumnado do colexio da vila; Ames instalou un photocall para retratarse e subir as imaxes ás redes sociais acompañadas de versos rosalianos co cancelo #rosalízate; en Tui, expuxéronse carteis con poemas polas rúas do centro da vila; e multitude de lecturas de poemas, recitais de música e exposicións de traballos plásticos tiveron lugar por todo o pais, desde A Guarda a Ribadeo e da Coruña a Celanova. De igual maneira, foron moitas as empresas que quixeron unirse á conmemoración a través de deseños especiais dos seus produtos ou de mensaxes nas redes sociais nas que asociaban o seu nome ao da principal autora da literatura galega. Breamo, novo punto do mapa rosaliano O ensino proxecta unha imaxe refrescante e actualizada da poeta O éxito da aproximación a Rosalía ten un especial calado entre as xeracións máis novas, que converten a cativada e a mocidade nun protagonista significado das actividades que decorren neste día. Malia que a coincidencia co Entroido dificultaba o desenvolvemento das actividades do Día de Rosalía, o ensino volveu demostrar que Rosalía é un referente da xente moza. Concursos de debuxo, plantacións de árbores conmemorativas, actividades de normalización lingüística, versos da poeta musicados polo estudantado, lecturas públicas e, desde logo, gravacións en tik-tok, instagram e outras redes sociais desde as que proxectar unha Rosalía actualizada e renovada. "Na posta en marcha do que hoxe é o Día de Rosalía púxose en marcha toda unha rede social que inclúe asociacións, entidaes, institucións...", declara Anxo Angueira, presidente da Fundación Rosalía de Castro, "pero ten unha especial importancia o traballo feito desde o ensino, por profesoras e profesores que desenvolven unha actividade colosal moitas veces en condicións moi adversas". As docentes consultados por Nós Diario coinciden en afirmar que a rapazada acolle "case como se pertencese a unha autora contemporánea deles" a obra de Rosalía e que os valores que representa son facilmente asumíbeis por unha xeración moi concienciada ante problemas sociais que seguen a ser apremante na actualidade. "Iso facilita a modernización da imaxe de Rosalía, a adaptación aos medios que eles manexan, como o audiovisual e as redes sociais". A AELG destaca o papel do profesorado na difusión da obra de Rosalía