Carlos Pérez presenta 'Carmucha VST': "O obxectivo de 'Carmucha VST' é pór a música tradicional galega ao alcance de todo o mundo"

—Que os levou a crear 'Carmucha VST'? Decatámonos de que non había nada semellante. Eu dedícome desde hai uns anos a facer este tipo de ferramentas virtuais para produtores musicais. É certo que hai unha aplicación para teléfono móbil con sons de pandeireta galega, mais non había ferramentas deste tipo para producir música tradicional galega. Xunteime con Miguel Ocampo, porque o meu problema era que non controlaba demasiado sobre este tipo de música, e el leva moitos anos tocando en grupos de música tradicional e en foliadas. —Un dos obxectivos é que sexa de utilidade para as escolas de música tradicional. A idea é que haxa dúas versións do programa. Unha, a versión VST (Virtual Studio Technology; Tecnoloxía de Estudo Virtual) para producións musicais, na que o usuario pode abrir a ferramenta dentro do seu programa de gravación, reproducir patróns de percusión –pandeireta, tamboril, pandeiro ou bombo– e engadilo á pista de gravación. Dentro de cada instrumento tes unha serie de patróns rítmicos entre os que podes escoller –muiñeira, pandeirada...–. Por outra parte, o programa tamén conta con outra versión dedicada a escolas de baile e mesmo de música para crianzas que queiran comezar a tocar a pandeireta ou o tamboril e queiran practicar na casa por enriba desta pista. É dicir, en vez de gravar só terías que abrir a aplicación de escritorio e escoitar o ritmo que queiras. O bo que ten esta ferramenta é que podes adaptar a velocidade coa que desexas practicar. A nosa intención con este programa era facer a nosa pequena homenaxe á cultura galega e a todas as persoas que a fixeron medrar a través da música. Decidimos nomear o programa 'Carmucha' pensando en todas as avoas e mulleres que son as primeiras en sacar a pandeireta cando hai unha comida familiar ou unha foliada, posto que esta é outra maneira máis de contribuír a enaltecer a cultura galega. É unha ferramenta totalmente de balde, sen ánimo de lucro e de acceso libre. Calquera vai poder entrar na páxina web, descargala e instalala no seu ordenador. —Cando terá lugar o lanzamento da ferramenta? Aínda non está completamente rematado, estamos pulindo os últimos detalles, mais agardamos poder subir a primeira versión a mediados ou finais de setembro. Esta será a versión beta e pouco a pouco iremos engadindo e mellorando as cousas segundo as necesidades que vaian xurdindo. O bo que teñen a tecnoloxía e os sistemas modernos de hoxe en día é que podes adaptar a cultura e a tradición aos tempos. Por exemplo, se tes interese en compor unha canción con ritmos de música tradicional mais non tes maneira de contactar con músicos, podes descargar esta ferramenta e comezar a facer probas. Non deixa de ser unha ferramenta virtual, unha simulación, e nunca vai substituír un músico real, mais é unha maneira de democratizar a creación deste tipo de música. Agardamos que tamén sexa unha motivación para a xente que queira comezar a facer música porque o obxectivo final é ese: pór a música tradicional ao alcance de todo o mundo, ben para mesturala con estilos contemporáneos ou ben para aquelas persoas que simplemente precisan practicar pasos de baile ou ensinar nunha aula.