As autoras encabezan os 50 libros máis lidos polos clubs de lectura escolares

Oito mulleres nos dez primeiros postos, con 'Infamia', de Ledicia Costas, na primeira posición
Ledicia Costas (Xerais).
photo_camera Ledicia Costas (Xerais).

Segundo a escolma publicada pola Asesoría de Bibliotecas Escolares dos 50 libros máis lidos polos Clubs de Lectura durante o curso 2019/2020, as mulleres teñen un peso fundamental como autoras das catro obras que máis circularon por estes grupos.

Á cabeza sitúase Infamia (Xerais), de Ledicia Costas, presente en 29 destas entidades, unha novela que protagoniza a avogada Emma Cruz ao trasladarse a Merlo para impartir clases na Universidade, sen saber que ese lugar está marcado pola desgraza coa misteriosa desaparición de dúas cativas.

Superando a vintena tamén se colocan Memoria do Silencio (Xerais), unha achega de Eva María Mejuto á presenza nazi na Galiza, e a viaxe transatlántica d'Os nenos da varíola (Galaxia), de María Solar, que este mesmo ano viu a estrea da súa adaptación teatral.

A estes tres títulos séguenlles Beleza vermella (Galaxia), de Arantza Portabales, e O último barco (Galaxia), de Domingo Villar.

Ledicia Costas triunfa

Costas demostra a súa boa acollida entre o público con outra entrada no sexto posto da lista, neste caso coa obra Jules Verne e a vida secreta das mulleres planta, así como se consolida máis abaixo con outros dos seus numerosos títulos para público infantil e xuvenil, como O corazón de Xúpiter; Escarlatina, a cociñeira defunta; Esmeraldina, a pequena defunta... Na sexta posición séguea O que sei do silencio, de Andrea Maceiras.

Tamén tradución

A tradución ao galego tamén ten peso entre as pezas máis lidas polos clubs, por exemplo con O neno do pixama de raias (Kalandraka), de John Boyne, na oitava entrada, ou Enderezo descoñecido (Xerais), de Kresmann Taylor, xa na décimo segunda.

A listaxe dá conta, aliás, do galego como lingua maioritaria de lectura entre as obras dos diversos clubs escolares. 

Comentarios