Antón Patiño inaugurou unha mostra no espazo Évame de Vigo

Onte inaugurouse no Espazo Évame - Oroza de Vigo (Subida á Costa, 5) a exposición A liña do labirinto, do artista, escritor e ensaísta, Antón Patiño. O escritor Alberto Avendaño, compoñente do grupo de Comunicación Poética Rompente, acompañou o evento recitando poemas do seu libro Caosmos, xunto coa guitarra do histórico Pepe Bordallo.

Antón Patiño reside en Vigo desde a súa adolescencia. Alí déixase seducir polo universo literario e cultural; o seu pai era libreiro e estaba en contacto coa elite da cidade: Lugrís, Laxeiro, Celso Emilio ou Blanco Amor. 

As súas primeiras manifestacións artísticas desenvólvense no campo do deseño gráfico, a ilustración e as artes visuais. Empeza a expoñer a mediados dos anos setenta nas mostras da praza da Princesa e alí entra en contacto con artistas mozos; algúns acompañarano máis adiante en Atlántica. Neste período coñece os poetas de Rompente e a artista Menchu Lamas —que se converterá na súa parella. En 1980 viaxa a Nova York xunto con Lamas, Huete e Monroy, experiencia que catalizará a xénese de Atlántica, un movemento nado nos 80 co obxectivo de situar a arte galega no panorama internacional; é considerado como un dos alentadores da experiencia. 

A súa obra percorre o mundo en numerosas e significativas exposicións e feiras de vangarda e forma parte de famosas coleccións como a Colección de Arte Contemporánea La Caixa, MNCARS, CGAC, MEIAC, MACBA ou a de Artium, entre outras. 

Activista cultural, paralelamente á súa faceta plástica desenvolve unha ampla actividade teórica: imparte conferencias e publica libros de poesía, ensaios e monografías de artistas. É considerado un dos artistas máis representativo das propostas galegas no panorama nacional dos anos oitenta.  

O labirinto é un dos símbolos que se repiten na súa obra,  cualificada polo crítico americano Donald Kuspit como “expresionismo conceptual” e marcada pola presenza simultánea do feito físico e poético.