Sabores alén do mar

Ensalada de endivias con pera, noces, salmón afumado e mollo de queixo azul Comezamos cunha ensalada moi gorentosa. A combinación do amargor das endivias co doce da pera e a salsa de queixo é deliciosa. Ingredientes (2 persoas): 2 endivias, 50 g de queixo azul, sal, 1 culler de aceite, 1 chorriño de leite, noces peladas, 1 pera, salmón afumado. Elaboración: No vaso dun batedor botamos o queixo, un chisco de sal, o aceite, unha ou dúas noces e un chorriño pequeno de leite. Batemos todo e reservamos. Cortamos a pera en cubiños e reservamos tamén. Colocamos nun prato as endivias cortadas, botamos sobre o centro os anaquiños de pera e as noces. Engadimos o salmón afumado ás endivias e regamos todo por enriba co mollo de queixo. Arroz caldoso con berberechos O arroz con berberechos é unha receita chea de sabor e moi sinxela, recomendamos desfrutala cun albariño ben fresquiño. Ingredientes (4 persoas): 500 g de berberechos, 300 g de arroz, 1 tomate maduro, 1 cebola. 2 dentes de allo. azafrán, 1 vaso de albariño, 1 l de fumet de peixe, aceite de oliva. Elaboración: Comezamos un par de horas antes, poñendo os berberechos en abundante auga con sal para depuralos. Pasadas as dúas horas lavámolos ben e escorrémolos. A continuación cortamos a cebola ben finiña e picamos os allos. Nunha pota ancha cun chorriño de aceite sofritimos a cebola e o allo cun chisco de sal até que estea transparente. Engadimos o tomate pelado e cortado en cadradiños pequenos e seguimos refogando uns minutos. Pasado este tempo botamos o vasiño de viño e deixamos reducir. Cando reduza engadimos o arroz e o azafrán e refogamos a lume forte uns 2 minutos. A continuación botamos o fumet de peixe e remexemos todo. Aos 10 minutos incorporamos os berberechos e deixamos outros 10 minutos a fogo medio-baixo. Finalmente retirámos do lume e deixámolo repousar tapado 5 minutos antes de desfrutalo. Torta de manga Rematamos cunha torta de manga, suave, esponxosa e cun sabor exquisito. Leva manga tanto na masa como por enriba para decorar, facendoa ademais ben vistosa. Ingredientes (6 persoas): 2 mangas, 3 ovos, 125 g de iogur natural ( 1 medida), 225 g de fariña ( 3 medidas), 130 g de azucre (1 medida) 130 g de aceite de oliva ( 1 medida), 16 g de lévedo en pó ( 1 sobre), manteiga. Elaboración: En primeiro lugar pelamos as mangas, separamos 300 g e o resto reservámolo para o recheo e adornar. Nun cunco botamos os ovos e batémolos ben até que espumen, a continuación engadimos o azucre e seguimos batendo. É moi importante batelos ben para que quede ben esponxoso o biscoito. Botamos o iogur e o aceite e continuamos batendo. Trituramos o mango, engadímolo aos ovos e mesturamos. Tamizamos a fariña co lévedo e botámola pouco a pouco mentras remexemos. Engrasamos un molde desmontábel de 23 cm de diámetro coa manteiga e vertemos nel a mestura. Metémolo no forno, que previamente quentamos a 180ºC, durante 40 minutos. Pasado este tempo sacámolo do forno e deixámolo arrefriar un chisco. Mentras, batemos a nata cun batedor de globo eléctrico, comezando a baixa potencia e subindo pouco a pouco até que estea case montada. Neste punto engadimos o azucre e seguimos batendo até que faga debuxos o batedor na nata. Para montar a torta cortamos o biscoito pola metade e enchémolo de nata con anacos pequenos de manga. Cubrímolo por enriba co resto da nata e cortamos anaquiños de manga para decorar formando unha flor.