Mestura cinéfila

Debutar na dirección de longametraxes cun filme como Reminiscencia, que mestura ciencia ficción, thriller de acción e cine negro, co apolíneo Hugh Jackman como cabeza de cartel, non debe ser nada doado en Hollywood, e se se trata do debut dunha muller... peor aínda. De feito, Lisa Joy, malia estar recoñecida polo mundiño por ser unha das creadoras da portentosa serie Westworld, xunto Jonathan Nolan, pensou en presentar o seu guión ás produtoras cun alcume masculino co gallo, segundo ela, "de ter máis oportunidades" xa que o campo da ciencia ficción semella reservado aos homes pois apenas hai mulleres referentes neste xénero. Joy pode cambiar o conto con este prometedor debut. Reminiscencia (Reminiscence) / Lisa Joy / EUA / 2021 / 116 min. Situada nun futuro próximo no que as mareas inundaron Miami converténdoa nunha Venecia nocturna de cristal e ferro na que os cidadáns dormen de día e fan vida pola noite, Jackman, tamén narrador, interpreta un tipo especializado en recuperar lembranzas a través dunha máquina de recordos xunto a súa axudante Watts (Thandiwe Newton). Un día chega Mae (Rebecca Ferguson), unha misteriosa e atractiva cliente pola que sente un interese máis aló do profesional. Pero nada é o que parece. A historia non é moi orixinal mais logra saír airosa por unha estimulante mestura entre clásicos do xénero aos que homenaxea (de Blade Runner a Orixe pasando por Días estraños), chiscadelas cinéfilas (a Vértigo ou A viaxe de Chihiro, por exemplo) e unha trama de pistas e ambientes sórdidos á altura das novelas de Raymond Chandler ou Dashiell Hammett. Conta cun impresionante deseño de produción e uns efectos especiais adaptados perfectamente á historia, nin espectaculares nin exiguos. O elenco está máis que aceptábel, cunha Newton e Ferguson estupendas e unha evolución aos infernos do personaxe principal ben transitada. Os secundarios cumpren a súa función, destacando Daniel Wu, coma xefe da mafia, Cliff Curtis, un poli corrupto, e Mojean Aria, o fillo do cacique da cidade. Ten esa particularidade de que ningún sobra. Todas as persoas que aparecen teñen un peso na historia. Algo que pode incomodar pola súa precisión/casualidade mais que encaixa neste tipo de filmes no que descubrir o que pasa é o quid da cuestión. Lisa Joy non só consegue un excelente neo-noir de ciencia ficción, para deleite das fans do xénero e do gran público en xeral, senón que tamén pode converterse nun referente ao abrir camiño para moitas mulleres que están creando neste campo, ou que non crean porque pensan que non as van tomar en serio.