Ruta San Filipe - Cariño

Unha camiñada para achegarse a ver, percorrer e coñecer a banda do norte da ría de Ferrol, no seu tramo máis "natural" que, polo seu abrupto relevo e a falta de abrigos, atópase libre de ocupación, aberto e sen atrancos que dificulten a vista do mar da ría nin a da paisaxe que a acolle, un traxecto sen dificultade no que podemos descubrir e visitar algúns lugares curiosos, menos coñecidos e visitados, desta contorna. Para iso temos que achegarnos desde Ferrol, pola Malata, a Cabana, e seguindo os indicadores do castelo de San Filipe, á Graña e ao lugar de San Filipe, e pasalo para atopar, na saída, o castelo onde temos espazo para deixar o vehículo e indicacións para enfrontarnos á camiñada. Se deixamos o coche na entrada do castelo temos que subir un pouco pola estrada para chegar ao punto de inicio da ruta, mais se imos até o punto de inicio do camiño acondicionado tamén temos espazo de aparcamento. O camiño, amplo, transcorre mantendo case o nivel, o que o fai doado de andar, para ir gozando das panorámicas da contorna. A uns 400 metros do comezo do paseo atopamos uns ocos na varanda desde os que saen carreiros polos que se pode baixar á praia da Caseta, e máis adiante á punta das Anclas. A escasamente 1,5 km do comezo chegamos á punta de San Carlos, onde se atopan os restos do castelo de San Carlos, outra das fortalezas defensivas da ría de Ferrol, e outro quilómetro máis adiante, rodeando a Ribeira de San Cristovo, alcanzamos a punta das Baterías na que se atopan os restos do castelo de San Cristovo, outro baluarte defensivo, e un miradoiro, onde rematan os 3 km do tramo acondicionado. Pero aproveitando a proximidade seguimos pola beira da estrada até a localidade de Cariño, recollida, detrás da praia, no seo da desembocadura do seu rego, o que conforma unha fermosa estampa. Non imos máis alá porque á saída de Cariño, na punta Barbeira, xa se atopa o feche do porto exterior. Á volta do percorrido non podemos deixar de visitar a localidade de San Filipe, asentada ao longo de case un quilómetro de costa no seo de Lousada, entre o castelo, e abrigada por el, e a punta do Bispón, que conta con praia e varios peiraos que acollen pequenas embarcacións tradicionais. Neste percorrido de case 5 km até a beira do porto exterior, máis a volta, e algo máis de 2 km ida e volta para percorrer San Felipe, se non baixamos polos carreiros á praia da Caseta nin á punta das Anclas, nin visitamos o castelo de San Felipe, ao que se pode acceder gratuitamente todos os días da semana. Xunto co castelo que se atopa do outro lado da ría, en Mugardos, o castelo da Palma, conformaron o sistema defensivo máis importante da ría de Ferrol. Completamos así unha andaina duns 12 km.