Un paseo por Cambados

Achegámonos a Cambados, á beira do mar da Arousa, conxunto histórico-artístico, onde poderemos facer un interesante percorrido urbano e paisaxístico, circular. Por sinalar un punto de inicio saímos desde diante do Concello para seguir polo xardín da Calzada, pasar por diante do Parador de Turismo, que se asenta no solar no que se atopaba o pazo de Bazán, subir pola rúa onde atopamos o pazo de Torrado, xardín público e espazo para as artes, para chegar á praza de Asorei, co monumento ao escultor diante da casa na que naceu, cara á que mira a reprodución dunha das súas pezas máis coñecidas, A Naiciña. Seguindo á esquerda pola rúa Real desembocamos na monumental praza de Fefiñáns enmarcada polo pazo, a igrexa e casas tradicionais. Volvemos até a praza de Asorei e seguimos dereito até chegarmos á igrexa parroquial, o que queda do antigo convento franciscano. Por detrás da igrexa subimos cara ás ruínas de Santa Mariña, os restos da antiga igrexa rodeada polo seu camposanto, unha das imaxes máis difundidas da vila e Monumento Nacional. Antes ou despois de velas non debemos esquecer subir ao outeiro que se atopa detrás, o monte da Pastora, un excelente miradoiro sobre a ría da que veremos, á esquerda, o seo do Umia, esteiro e desembocadura do río, que fai parte do LIC/ZEC Ons-O Grove e zona ZEPA na que inverna un bo número de especies de interese, detrás del, o istmo da Lanzada e, máis alá, a illa de Ons; no centro a illa da Toxa e a península do Grove, Sálvora e os illotes da boca da ría, e á dereita, na banda do norte, Aguiño, Ribeira, a serra do Barbanza e a Arousa, a illa que lle da nome á ría. Baixando do monte da Pastora volvemos até diante do museo do viño e imos á esquerda, un tramo case recto de 1 quilómetro que nos leva a San Tomé, onde pasamos por diante do Pazo de Montesacro, até que ao final da rúa imos á dereita para chegar á torre de San Sadurniño, restos dunha antiga torre do sistema defensivo medieval da ría, asentada nun pequeno illote un fermoso lugar para un baño se está a marea alta ou para un paseo polo extenso areal no que as mariscadoras cultivan e apañan ameixas e berberechos. De volta da torre imos á esquerda pola rúa de máis á beira do mar para saír ao peirao de San Tomé e a dársena do porto. Pola beira do mar, seguindo o paseo marítimo, desde onde, se a hora axuda, podemos gozar de magníficos solpores, volvemos ao punto de partida ou, no remate da praia, irmos pola rúa da dereita para percorrer a antiga rúa principal, na que atoparemos as capelas de Santa Margarida e do Hospital e casas de diferentes épocas e estilos, que tamén remata diante do concello.