O litoral de Cangas, entre dúas rías

A grande amplitude e variedade da costa de Cangas fai complicado abranguela nunha visita dunha única xornada. Tampouco é doado facer un percorrido lineal porque hai zonas de difícil acceso, estradas de ida e volta, e dun só sentido, e espazos ocupados por instalacións portuarias ou propiedades particulares; nin é recomendábel facelo nos meses de verán, con problemas de circulación e aparcamento. Mais, con todo, nunha viaxe en coche, poderemos visitar os puntos máis singulares do espazo, do que unha boa parte se atopa protexido como Lugar de Interese Comunitario e Zona de Especial Conservación. Paraxe: O Morrazo / Concello: Cangas / Percorrido: 50 km + camiñadas / Dificultade: Baixa Comezamos na ría de Vigo. Na estrada de Cangas a Moaña collemos o desvío que nos leva á punta e a praia Rodeira, desde onde podemos ver tamén a praia da Cova da Lontra, a punta e illa dos Ratos e a praia de Canabal. Volvemos á estrada principal e seguimos até Cangas, onde paramos para camiñar polo paseo litoral e ver o porto e a vila. Continuamos pola estrada que vai ao Hío e Aldán e desviámonos á punta do Salgueirón para ver as praias do Salgueirón e A Bouciña, antigos portos, e a fábrica de Massó. De volta na estrada, máis adiante, collemos o desvío ao Cabo Balea, á praia e porto da Congorza, onde están os restos das factorías Baleeiras, a Ribeira do Medio, A Redonda e a punta do Corveiro. Volvemos á estrada principal até Darbo, onde a deixamos para ir á praia de Liméns. Volvemos atrás e seguimos até O Hío e desde alí imos ás praias de Nerga. Volvemos ao Hío para irmos logo ás praias de Area Meán e Barra, desde onde temos á dereita a punta Sobrido, coas Pinelas e o faro. Na estrada de volta ao Hío collemos o desvío a Donón para irmos ao miradoiro da Costa da Vela, desde onde saen pistas de terra, á esquerda, para achegarse ao cabo Home, á punta Robaleira, á praia de Melide e á punta Sobrido; e á dereita á que leva ao camiño (de facer a pé) que sobe ao Facho e castro de Donón. De novo no Hío collemos en dirección á praia de Areabrava, un fermoso areal cun bo sistema dunar. Podemos achegarnos tamén, por estradas moi estreitas, ou a pé, até outras praias da zona, máis preto da punta de Couso ou no camiño de volta a Aldán-Castiñeira, Pipín, San Xián, Pinténs e Arnelas. De volta no Hío imos a Vilariño e Aldán onde faremos unha parada para ver as praias e o porto (un paseo permite percorrer a zona). Desde Aldán seguimos a estrada que vai a Bueu e desviámonos á praia de Areacova, desde a que podemos achegarnos á punta da Pedra Rubia e á praia da Cova da Balea. Volvemos á estrada e seguimos até Menduíña, onde despois de ver a praia, a punta e as Laxes da Cativa, e as puntas de Menduíña Norte e do Niño do Corvo, rematamos a viaxe.