Opinión

Palabras maiores

"Cando os membros da Comisión Europea comezaron o seu mandato de cinco anos en decembro de 2019, ninguén podía imaxinar que, só uns meses despois, estarían aplicando o maior paquete de axudas con cargo ao orzamento da EU: o Marco Financeiro Plurianual (MFP) e o Programa NextGenerationEU; que estarían pondo en marcha a maior estratexia de vacinación da historia da EU ou creando nun tempo escaso un sistema de certificación dixital utilizado por 60 países de cinco continentes". Así comeza o seu discurso de avaliación de metade de mandato a Presidenta da Comisión Ursula von der Leyen. 

Fala tamén do Pacto Verde, o compromiso para acadar en 2050 a neutralidade climática, algo escrito na Lei Europea do Clima e das máis de 2000 medidas para amortecer o impacto económico da pandemia. Como non podería ser doutro xeito, fala de salvagardar a igualdade e o Estado de Dereito e de protexer os cidadáns da Unión Europea. Aí, a Presidenta resulta menos explícita, planeando un desexo máis que unha realidade. A discriminación estrutural está realmente aquí, no día a día, e tal parece que os gobernos conservadores dos varios países da UE están precisamente para contradicir as palabras do Presidenta. 

A realidade contradí o triunfalismo. O avance na igualdade de dereitos sociais é variábel e asimétrico, os obxectivos da Lei do Clima semellan tímidos e, probabelmente, serán revisados (á baixa, por descontado), a desinformación da poboación vai en aumento, a aculturación aumenta e a xustiza social resulta un obxectivo móbil, que se afasta en troques de se achegar.  

Noutras palabras, os obxectivos (preparación para futuras crises sanitarias, liderar a transformación dixital, avanzar na consolidación da democracia, garantir condicións de traballo máis xustas e loitar contra o mudar do clima) son -todos eles- asumíbeis pola poboación, mais temo que non o sexan (máis alá das palabras) polos varios gobernos conservadores que se dan en Europa. Cousas veremos que farán falar as pedras.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.