domingo 01/08/21

Mariscal de Gante, o apelido

[María Obelleiro]

Compañeiro de armas do Exército nazi durante a II Guerra Mundial como voluntario da División Azul, comisario da Brigada Político Social e xuíz do Tribunal de Orde Pública, Jaime Mariscal de Gante y Moreno instruíu algunhas das causas máis destacadas contra os demócratas galegos entre 1966 e 1974. A súa sinatura ficou estampada na sentenza contra os estudantes procesados polas protestas compostelás de 1968 e na resolución contra os condenados en 1967 por penduraren autocolantes coa lenda "Liberdade para Galiza". Morto o ditador e aprobada a constitución de 1978, estivo no Tribunal Supremo.

Outra Mariscal de Gante foi a encargada de ditar sentenza contra 41 dirixentes políticos e funcionarios cataláns acusados polo Tribunal de Contas por supostos gastos indebidos durante 2011 e 2017. Filla de Jaime, xurista de formación, membro do Consello Xeral do Poder Xudicial a proposta do PP, foi ministra de Xustiza na primeira lexislatura de Aznar. Despois, mantívose como deputada cuneira por Albacete, sendo recolocada en 2012 polo PP no Tribunal de Contas.

Mariscal de Gante, o apelido
comentarios