O sindicato STEG secunda a convocatoria da folga educativa convocada pola CIG o 25 de setembro
O Sindicato de Traballadoras e Traballadores do Ensino de Galiza (STEG) trasladou que secundará a convocatoria da folga educativa convocada pola Confederación Intersindical Galega (CIG) prevista para a vindeira quinta feira 25 de setembro.
Tal e como subliñou o STEG nunha nota de prensa, unha enquisa realizada a finais do curso pasado, que contou coa participación de 1.000 docentes, evidenciou o "empeoramento" da situación laboral do profesorado galego.
Algúns dos puntos sinalados polos enquisados foron a "burocracia excesiva, as aulas masificadas, os medios insuficientes para tratar a diversidade e a falta de recursos materiais e humanos nos centros".
A estes problemas, no caso do profesorado interino, hai que sumarlle a "inestabilidade e discriminación", ao "non ter dereito á cobranza dos meses de verán aínda que se teña traballado o curso completo".
Por estes motivos, o 95% do profesorado enquisado considerou necesario iniciar o curso 2025-26 cun proceso de mobilizacións. O 73% mostrábase partidario dunha folga indefinida como medida central, mentres que outras propostas incluían manifestacións e folgas puntuais.
Nesta liña, representantes do STEG iniciaron en xuño unha roda de contactos con diferentes organizacións sindicais, incluídas a CIG e CSIF, considerando necesario "crear un espazo común de coordinación sindical real, con participación horizontal e capacidade de decisión compartida".
Así, tras a convocatoria da folga por parte da CIG, o STEG acordou sumarse por "responsabilidade co profesorado galego". Con esta paralización do ensino, o sindicato pide recuperar o horario lectivo de 18 horas máximas en secundaria e FP e de 21 horas para o de infantil e primaria, así como a redución real e inmediata das ratios.
Tamén reclaman a recuperación salarial das perdas acumuladas polo profesorado galego, a eliminación do control ideolóxico sobre as actividades complementarias á formación por parte da Inspección Educativa e a aplicación efectiva e inmediata dun plan de redución da burocracia, entre outras peticións. A folga é o seguinte paso previsto polos sindicatos, despois da manifestación do pasado sábado en Santiago de Compostela, convocada pola CIG.
