O persoal do metal de Pontevedra perdeu 3.000 euros desde 2020 pola inflación

Milleiros de traballadores do metal manifestáronse esta terza feira ante o acceso do Instituto Feiral de Vigo (Ifevi), no día en que se inauguraba a Feira Mindtech, un dos principais eventos da industria do metal e organizado pola Asociación de Industrias do Metal e Tecnoloxías Asociadas (Asime), parte da patronal. Milleiros de traballadores do metal colapsan os accesos ao Ifevi no primeiro día da Mindtech Desde as 9.30 horas, centenares de empregados do sector foron chegando ás inmediacións do Ifevi, e contra as 10.30 horas dúas grandes manifestacións que partiron do pavillón do Loureiro e do de Panelfa confluíron na rotonda do aeroporto, nun momento no que tamén se formaron colas quilométricas na autoestrada AP-9 ao seu carón. Axentes da Policía Nacional impediron que os milleiros de traballadores, que esta terza feira estaban en folga, accederan ao Ifevi. Non obstante, entre berros, os manifestantes volveron reclamar a Asime que "escoite os traballadores" xa que "non están a pedir imposíbeis". Xulio Fernández, da CIG-Industria, reivindicou o "músculo do sector" para alcanzar un "convenio digno", polo que advertiu da convocatoria de máis xornadas de folga para conseguir "si ou si" o que se propoñen. Preguntado polo seguimento do paro, subliñou que a pasada quinta feira, primeiro día de folga, o paro foi "total", ao igual que esta terza feira, o que fixo que os estaleiros non puidesen operar. O portavoz de UXT, Rubén Pérez, solicitou "sentido común" na mesa negociadora do convenio para que os empresarios "traian propostas que permitan desconvocar o conflito". Pola súa parte, Celso Carnero, de CCOO, sinalou que esta manifestación é a mostra de que os traballadores se manifestan "por vontade propia" porque "queren chegar a fin de mes". Os motivos do conflito Sindicatos e patronal do metal non lograron alcanzar esta segunda feira un acordo de convenio colectivo para o sector, polo que os traballadores decidiron manter as xornadas de folga anunciadas para esta terza feira, 20 de xuño, así como para esta quinta feira, 22. Colas dun quilómetro na AP-9 na saída de Peinador o primeiro día de Mindtech, que coincide coa folga do metal Así mesmo, a CIG anunciou a convocatoria de folga para o próximo 28 de xuño, un paro que manterán de non chegar aun acordo coa patronal e ao que probabelmente, segundo puido saber Nós Diario, tamén se adherirán CCOO e UXT. As tres cuestión esenciais que permitirían desbloquear o conflito laboral e que provocan a insistencia das centrais sindicais na convocatoria de xornadas de folga son incluír unha cláusula de revisión salarial conforme ao Índice de Prezos de Consumo (IPC) real, reducir a xornada anual en máis de oito horas e garantir a subrogación do persoal entre empresas privadas. Na última mesa de negociacións entre sindicatos e patronal, que tivo lugar a pasada segunda feira, a parte empresarial propuxo unha suba salarial de 8% en tres anos, dividida en 2% este ano e 3% en 2024 e 2025. Os sindicatos do metal reivindican subas de salarios de 4% nos anos 2023, 2024 e 2025 Porén, os sindicatos, ante a perda de poder adquisitivo do persoal do sector derivada da non percepción de atrasos nos salarios entre 2020 e 2022, reivindican un aumento de salarios de 4% durante cada un dos tres anos de vixencia do convenio. Ademais, a representación das empresas negouse a incluír no novo convenio unha redución de xornada anual de máis de oito horas, unha cláusula de revisión dos salarios en base ao IPC real (o que evitaría novas perdas de poder adquisitivo por parte do persoal durante os tres anos de vixencia do convenio), nin garantiu a subrogación dos postos de traballo entre empresas privadas (o que evitaría que os potenciais cambios de propiedade da xestión das factorías puidesen provocar o despedimento do persoal traballador do sector). Cláusula de revisión real A principal reivindicación do persoal do sector do metal de Pontevedra nestas xornadas de folga, que están tendo as manifestacións máis multitudinarias desde as históricas mobilizacións de 2009, é o estabelecemento dunha cláusula de revisión de salario ao respecto do IPC que sexa real e efectiva. O metal de Pontevedra mantén a folga ao fracasar as negociacións entre sindicatos e patronal Neste senso, denuncian representantes do persoal, as subas do IPC en 2020 (o,5%), en 2021 (3%) e en 2022 (3,95%) foron engadidas nas contías dos salarios ao comezo dos exercicios seguintes, mais a cláusula de revisión estabelecida no convenio non era de efecto inmediato, polo que non se retribuíu a perda de poder adquisitivo durante os 12 meses de cada ano. Esta situación, sinalan, provocou unha perda media de arredor de 2.500 euros para cada peón e de 3.000 euros para cada encargado durante os tres anos de vixencia do convenio. Por isto, reivindican facer efectiva a cláusula no futuro para que se cobren os atrasos. Mindtech inaugúrase entre protestas A III edición da Feira Mindtech da industrial do metal e tecnoloxías asociadas organizada por Asime inaugurouse esta terza feira, dando comezo a tres días de congreso que reunirán no Ifevi a máis de 200 expositores e uns 10.000 visitantes. Con todo, o arranque desta feira viuse marcado pola folga levada a cabo por miles de traballadores do sector do metal da área de Pontevedra, que se manifestaron na cidade de Vigo, confluíndo dúas marchas ás portas do Ifevi.