Persoal da banca reivindica que os beneficios récord do sector sirvan para reverter a súa perda de poder adquisitivo

Traballadoras e traballadores do sector da banca realizaron esta segunda feira un paro de dúas horas -das 8 horas ás 10 horas- convocado inicialmente pola Federación Forza, Independencia e Emprego (FINE), a Unión Xeral de Traballadores (UXT) e Comisión Obreiras (CCOO), mais tamén apoiado polo resto de organizacións que teñen presenza nas mesas de negociación. A convocatoria contou cun amplo seguimento na Galiza -onde se puideron observar numerosas oficinas fechadas a primeira hora da mañá-, que as organizacións convocantes cualificaron de "histórico". Desta maneira, segundo sinalaron, 82% das 7.200 persoas empregadas no sector financeiro no país secundaron esta folga parcial. Ademais, producíronse concentracións na Coruña e en Vigo. Amplo seguimento na Galiza do paro da banca, con varias oficinas fechadas durante dúas horas O paro de dúas horas foi concibido como unha medida de presión por parte das organizacións sindicais para solicitar unha mellora nas condicións salariais no marco das negociacións dos convenios colectivos que se están a producir durante estas semanas. A CIG, ELA, SEC e a Intersindical convocaron unha folga de 24 horas para esta quinta feira Pola súa parte, o sindicato galego CIG, o vasco ELA, así como os cataláns SEC e A Intersindical convocaron para a quinta feira unha xornada íntegra de folga en demanda de melloras no convenio colectivo nos bancos da Asociación Española de Banca (AEB), que engloba a maioría das principais entidades estatais. Neste sentido, estes catro sindicatos apoiaron os paros parciais desta segunda feira "sen perder de vista" a súa convocatoria do 29 de febreiro. "Compartimos a necesidade de convocar folga no sector, mais debe ser o antes posíbel, non podemos seguir soportando máis desprezos da patronal", explicaron ao respecto. En paralelo, tanto FINE como CCOO e UXT fixeron un chamado a unha folga de 24 horas para o 22 de marzo, coincidindo coas xuntas de accionistas de Santander e Caixabank. Ao respecto, a responsábel do Sector Bancario da CIG-Banca, Rosa Conde, explica a Nós Diario que o seu sindicato "apoiou os paros desta segunda feira e por suposto apoiará os do 22 de marzo, porque cremos que debemos ir todos e todas a unha. Mais da mesma maneira entendemos que as organizacións estatais deberían apoiar a folga do 29 de febreiro, porque aquí do que se trata é de conseguir melloras para o conxunto das traballadoras e das traballadores". "Fartura e desengano" Os sindicatos piden subas de entre 17% e 23% en catro anos Os sindicatos demandan melloras salariais de entre 17% e 23% para o conxunto dos catro anos que duren os convenios colectivos de Banca, Aforro e Cooperativas de Crédito. Porén, as propostas das patronais están lonxe desas revalorizacións. A última oferta por parte da AEB é unha suba salarial de 8% en catro anos, unha cifra similar á ofrecida polas patronais de Crédito (Unacc e Asemecc), aínda que no seu caso a alza produciríase en tres anos. Do seu lado, a CECA (que aglutina as entidades bancarias xurdidas da extinción das caixas de aforros) elevou a 7,5% nun período de tres anos a súa proposta de alza salarial. Sindicatos convocan unha folga en banca para o 29 de febreiro en demanda de "melloras" no convenio colectivo As reunións entre patronais e sindicatos produciranse algunhas semanas antes da folga do 22 de marzo. A representación do persoal organizará a súa sexta xornada de negociación coa AEB o 29 de febreiro, a cuarta xornada con Unacc e Asemecc o 7 de marzo, así como a sétima coa CECA o 12 de marzo. Jorge Villarino, representante de CCOO: "O paro do persoal evidencia a súa fartura e desengano coa patronal, que esquece os quen realmente xeran os beneficios" O responsábel do sector Financeiro de CCOO-Servizos na Galiza, Jorge Villarino, salientou que o paro do persoal da banca evidencia a súa "fartura e desengano" coa patronal, xa que "un ano de beneficios récord empregarase para aumentar o 'bonus' dos directivos e a retribución dos accionistas", mais "esquecendo as persoas que realmente xeran eses beneficios, que son os traballadores das entidades". Así, Villarino instou as cúpulas directivas dun sector "que bateu todas as súas marcas de beneficios" a "reverteren os seus aumentos de soldos e reparticións de dividendos para, con iso, incrementaren de maneira xusta os salarios do persoal, fixar un límite sectorial e por empresa do tipo de xuro dos préstamos, reducir a carga laboral e a presión comercial e dotar os centros de traballo do persoal axeitado para dar un servizo de calidade". Pasos previos na Galiza Abanca, a entidade financeira con maior implantación na Galiza, a pesar de estar integrada na patronal da CECA, desmarcouse da estratexia de negociación do resto de entidades, froito da mobilización dos sindicatos CIG e ASCA (Alternativa Sindical de Caixas de Aforros), que convocaron unha xornada de folga neste banco o pasado 11 de xaneiro. A banca estatal reduciu 42% o seu persoal desde o ano 2008 Segundo expuñan na altura, os soldos do convenio que agrupa os bancos nados das antigas caixas, entre eles Abanca, aumentaran 5,1% desde 2010, nun período no que o custo da vida subiu 27,1%. Despois do pulso sindical, a entidade anunciou o 27 de xaneiro unha suba de 8% nos salarios con carácter inmediato a todo o cadro de persoal e a apertura de negociacións sobre o resto de reivindicacións. A CIG apela á "unidade de acción" entre os sindicatos Rosa Conde, a responsábel do Sector Bancario da CIG-Banca, en declaracións a este xornal, apela á "unidade de acción nun momento decisivo". "As grandes entidades financeiras veñen de declarar beneficios récord e estase falando de incrementar as retribucións dos directivos e os dividendos dos accionistas", explica. E mentres, engade, "os traballadores e as traballadoras da banca, que veñen de soportar anos de reducións de persoal e de feches de oficinas, son quen non obteñen beneficio tras un longo período de perda de poder adquisitivo". Por iso, Conde pide "deixar a un lado os protagonismos estériles para recuperar a capacidade de compra". Situación en Abanca Rosa Conde, representante da CIG: "Abanca está noutra fase despois da suba dos soldos e a apertura de negociacións tras a mobilización de xaneiro" Despois da mobilización do persoal de Abanca en xaneiro, a empresa subiu o salario 8% para o ano 2024, con independencia do que aconteza nas negociacións do convenio da CECA. Esta suba non pode ser absorbida por complementos, polo que será efectiva para o conxunto de traballadores e traballadoras. "Agora está aberta unha mesa na que se está negociando todo o que se pedía na mobilización, en función de como avance haberá novas protestas ou non, mais agora o persoal de Abanca está noutra fase diferente ao do resto de entidades", conclúe Conde.