Persoal traballador de Comisións Obreiras na Galiza, en folga indefinida desde esta semana para solicitar un novo convenio colectivo e melloras salariais, denunciaron o "silencio" do sindicato e do seu secretario xeral, Unai Sordo, que asistiu esta cuarta feira en Teo ás xornadas 'Galeuscat Sindical', no restaurante Os Carballos, onde se concentraron os empregados galegos.
A presidenta do comité intercentros de CCOO na Galiza, Nieves Guantes, lembrou que o persoal está en folga indefinida pola falta dun convenio colectivo. "Levamos anos co covenio paralizado, conxelado, desde 2014, cun único incremento de 1,9% en 2019 a cambio de renunicar ao dereito de xubilación aos 65 anos", censurou.
"Non temos máis beneficios sociais", continuou. "O sindicato di que temos moitos, pero os que temos están desde 2002 e xa foi por renunciar a incrementos económicos", explicou.
Tal e como relatou, empezaron a negociar en xaneiro de 2022 e en setembro racharon as negociacións porque, "por primeira vez, o sindicato negouse a sentar e mandou dúas compañeiras. De Recursos Humanos, si, pero compañeiras á fin e o cabo, negociando o seu propio convenio e sen ningunha posibilidade de moverse en nada, simples mandatarias".
Denuncian, así mesmo, non recibir aínda ningunha resposta ás súas demandas. Rememorou Nieves Guantes a este respecto que hai dúas semanas tiveron tres reunións, chamados polo Consello Galego de Relacións Laborais, ás que si acudiu a responsábel de organización do sindicato a nivel estatal.
"Alí tentamos romper un pouco o desbloqueo e baixáronse á metade as peticións, cando menos para que sentasen a negociar. Iso foi o día 12; o día 13, cando viron que tiñamos convocada unha folga, anularon a súa última oferta", comenta.
Considera a presidenta do comité que o que diferencia a problemática galega da do resto de territorios do Estado é "a tozudez". "Non imos dicir que noutros sitios non hai problemas, porque os hai, pero teñen convenios actualizados de 2020, 2021 ou 2022. O noso está desde 2014", argumentou.
Sinalou tamén que o sindicato conta con recursos económicos para facer fronte a estas melloras. "Parece ser que están a amortizar anticipadamente a débeda asumida de Forem (Formación), pagouse en man unha obra, o sindicato incrementou as cotas en 9,1%, as subvencións en 37% e as asesorías xurídicas están sobre 9 e pico por cento por riba, e en facturación, estamos 30% por riba da media estatal", afirma Guantes.
Por último, asegurou que os traballadores e traballadoras van "a por todas", e lamentou non recibir resposta tampouco por parte do secretario xeral do sindicato, Unai Sordo, a quen enviaron dous correos electrónicos e do que recibiron "a calada por resposta", tanto do propio Sordo "como da Executiva".