A desigualdade salarial entre Galiza e España

Os salarios en Galiza son, en promedio, un 13,4% inferiores ao salario medio español. Así o indican os datos publicados polo IGE no relativo aos custos laborais, un xeito de analizar os salarios a través dos pagos que fan os empregadores ás persoas traballadoras. En termos anuais, o pago medio en salarios en Galiza para 2023 foi de 23.655€, mentres esta cifra ascendeu até os 26,555€ no conxunto do Estado. Esta situación é particularmente relevante porque dende o ano 2001 (primeiro no que temos datos) a diferenza en termos relativos mantívose practicamente inalterada: dunha diferenza do 13,57% ao 13,38% actual. En termos porcentuais non hai ningún tipo de converxencia nos ingresos da clase traballadora galega fronte á estatal. A situación non quere dicir que os salarios galegos non aumentaran (que o fixeron nun 60% no período), senón que medraron ao mesmo ritmo que os salarios españois, cando sería necesario un incremento a maior velocidade para achegarnos ás cifras estatais. Como consecuencia desta evolución, na actualidade un traballador galego cobra, de media, 3.133€ menos ao ano do que un traballador “promedio” español, cando esta diferenza era de 1.978€ no ano 2001. É dicir, un traballador galego precisa traballar case 13 meses e medio para cobrar o mesmo que un traballador español obtén en 12. E hai un segundo elemento relevante nesta análise: como foi comentado, os salarios tanto en Galiza como no Estado Español aumentaron ao redor dun 60% dende o ano 2001 ao ano 2023, polo que nunha primeira aproximación parece un dato positivo. Sen embargo, cando temos en conta o efecto da inflación acumulada durante estas dúas décadas, a situación cambia de xeito relevante, xa que a capacidade adquisitiva das traballadoras e traballadores mesmo se reduciu neste período: mentres os salarios galegos aumentaron un 60,6%, a inflación acumulada foi do 65%. É dicir, na actualidade a capacidade de compra dun traballador promedio galego é inferior á de hai 23 anos. Os salarios en Galiza son inferiores aos españois, e a diferenza nas últimas dúas décadas tendeu a aumentar lixeiramente Hai que ter en conta, ademais, que a inflación en Galiza foi lixeiramente superior á inflación estatal (un 65% fronte a un 63%), polo que tendo en conta o efecto da inflación, os salarios en Galiza na actualidade son lixeiramente máis desiguais co Estado Español que a inicios de século. As diferenzas por sectores En terceiro lugar, tamén resultan chamativas as diferenzas sectoriais nos salarios, sobre todo tendo en conta a estrutura económica galega. Os datos non nos dan cifras dos salarios para o sector primario, pero si que nos permiten observar a evolución para o sector industrial, a construción e os servizos. Nese sentido, os salarios máis elevados sitúanse na industria (por riba dos 27.600€), seguidos da construción (24.341€) e, por último, nos servizos (cunha media de 22.404€). Como podemos observar, os sectores máis precarizados dende o punto de vista salarial están nas actividades de servizos, cun salario promedio máis de 5.000€ ao ano inferior ás actividades industriais. Dous elementos axudan a comprender esta realidade: as principais actividades de servizos na economía galega son de baixo valor engadido (xeralmente ligadas á hostalaría) polo que os salarios son máis baixos; en segundo lugar, o elevado grao de organización sindical nas actividades industriais aumenta a capacidade de presión da clase obreira e facilita condicións laborais e salariais superiores ao doutros sectores. Por último, tamén é rechamante a distribución salarial no relativo ao tamaño das empresas. Polo xeral, as empresas de menor tamaño tenden a pagar salarios inferiores a aquelas de máis tamaño, e isto obsérvase para a realidade galega. Mentres o salario medio nas empresas de menos de 50 traballadores en Galiza é de tan só 19.805€, nas empresas de máis de 200 traballadores esta cifra aumenta até os 28.876€. Nese sentido, a estrutura empresarial galega parece dificultar o incremento salarial, xa que a inmensa maioría son microempresas ou pequenas empresas: o 99,3% das 230.000 empresas radicadas en Galiza teñen menos de 50 traballadores. Polo tanto, os datos amosan que os salarios en Galiza son inferiores aos españois, e a diferenza nas últimas dúas décadas tendeu a aumentar lixeiramente. Nese mesmo período a capacidade adquisitiva tendeu a caer para Galiza dun xeito máis acelerado que no conxunto do Estado. En termos sectoriais, a industria ofrece mellores oportunidades salariais que o resto de sectores, e en termos de tamaño empresarial, aquelas de maior tamaño pagan maiores salarios que as máis pequenas.