As confrarías analizan os riscos da eólica mariña para impugnar os POEM no Supremo

A Plataforma en Defensa da Pesca e os Ecosistemas Mariños anunciou esta cuarta feira o inicio dos trámites para proceder á impugnación dos Plans de ordenación do espazo marítimo (POEM) aprobados polo Executivo do Estado español. Ademais, a plataforma pediu a "retirada" de ditos plans e instou a dimitir a ministra para a Transición Ecolóxica e o Reto Demográfico, Teresa Ribera, polas consecuencias que terían sobre a actividade pesqueira. O BNG urxe a que o Goberno español rectifique sobre a eólica mariña na Galiza Así o manifestaron membros desta organización do sector do mar tras unha reunión mantida co Observatorio do Litoral da Universidade da Coruña (UDC) para valorar unha posíbel impugnación, na vía contencioso-administrativa, do Real Decreto que aproba os POEM. Na comparecencia ante os medios estiveron presentes o presidente da Federación Galega Confrarías, Jose Antonio Pérez Sieira; o presidente Federación Estatal de Confrarías e da Plataforma en Defensa da Pesca e os Ecosistemas Mariños, Basilio Otero; o asesor xurídico da Federación Nacional de Confrarías e portavoz da plataforma, Torcuato Teixeira; e o presidente da Asociación de Armadores de Ribeira, Nacho Vázquez. Teixeira anunciou a sinatura dun convenio co Observatorio do Litoral da UDC para a elaboración "nos próximos días" dun informe xurídico "con datos obxectivos" para saber se o Real Decreto incumpre normas estatais ou internacionais que posibiliten a súa impugnación. "Hai indicios de que efectivamente pode ser impugnábel ante o Tribunal Supremo", asegurou. A Plataforma en defensa da pesca pedirá paralizar de forma cautelar os POEM "En base a este documento e a outros informes de carácter biolóxico que pediremos a diferentes institucións para que se valore tamén o impacto que está a haber sobre os ecosistemas mariños imos impugnar este Real Decreto publicado o pasado sábado", avanzou. Van solicitar, ademais, como medida cautelar, a súa suspensión "polos danos e prexuízos que isto pode ocasionar", explicou o portavoz da plataforma en defensa da pesca. "O Ministerio para a Transición Ecolóxica e para o Reto Demográfico (Miteco) declarou unha guerra ao sector pesqueiro e aos ecosistemas mariños, a toda a sociedade e aos intereses xerais", afirmou Teixeira. "Non nos valen armisticios en base a futuras compensacións", sinalou en relación á posibilidade de que se dean axudas ao sector afectado pola eólica mariña. "A vía que deixamos moi clara é que se teñen que retirar os POEM e que ten que dimitir a persoa que fixo esta declaración de guerra que é a ministra", sentenciou. Basilio Otero, pola súa parte, recalcou a importancia de avanzar en enerxías renovábeis. "Somos os primeiros que así o queremos, o que non estamos dispostos é a que este avance nos custe postos de traballo", indicou. "Temos que facer un borrón e conta nova e volver sentarnos para iniciar outra vez os trámites para saber se é posíbel no noso litoral pór estes polígonos eólicos mariños, pouco estudados no mundo enteiro", puntualizou. O sector pesqueiro manifestarase o 11 de marzo na cidade da coruña Nesta liña, José Antonio Pérez Sieira avanzou que van solicitar unha reunión co presidente do Executivo español, Pedro Sánchez, para "que intente axudar con este problema". En calquera caso, este sábado día 11 de marzo levarán a cabo unha concentración na Coruña ante a Delegación do Goberno español na Galiza. "Non imos parar até que este decreto pase a mellor vida", apostilou o presidente da federación das confrarías galegas. Votación no Parlamento Precisamente, o Parlamento da Galiza votou esta cuarta feira unha Proposición Non de Lei (PNL) presentada polo BNG ao respecto desta cuestión. A iniciativa, rexeitada polos grupos do PP e do PSdeG, pretendía demandar ao Goberno do Estado desenvolver a "prohibición da instalación de parques ou polígonos para a produción de enerxía eléctrica mediante eólica mariña na costa da Galiza e do Cantábrico Noroeste". Ademais, a PNL solicitaba ao Executivo estatal "que avalíe o impacto socioeconómico da implantación da eólica mariña na Galiza antes de proceder á planificación do espazo mariño e, en todo caso, antes de permitir a implantación de eólicos mariños nas costas galegas". "Se afecta a pesca, que se prohiba a eólica mariña" En conversa con Nós Diario, Basilio Otero explica que "pedir unha prohibición [da eólica mariña] paréceme un pouco unha emenda á totalidade". Porén, di, "se afecta a frota pesqueira, desde logo que prohibición total". A frota rexeita recibir compensacións pola eólica mariña: "O que queremos é traballar" "Pedimos a retirada dos POEM tal e como están redactados e publicados, e evidentemente que as autoridades competentes se senten co sector pesqueiro para falar sobre onde se poden, de ser o caso, colocar os polígonos de eólica mariña", explica o presidente da federación estatal de confrarías de pescadores. "Desde logo onde están planificados agora mesmo non se poden pór porque a nosa actividade realízase xusto en fronte desa localización, unha información que coñece o Executivo estatal porque lle foi remitida por nós mesmos", explica Otero, que afirma que os Gobernos galego e español non se comunicaron con el para darlle resposta sobre as reivindicacións da frota. Bateeiros anuncian novas mobilizacións contra a Xunta Representantes de 28 asociacións que explotan un total de 2.000 bateas de mexillón anunciaron esta cuarta feira, nun acto na Illa de Arousa ao que acudiron máis de 200 persoas, que non abandonarán as protestas até que se derogue o artigo 13 do decreto para a xestión dos recursos marisqueiros aprobado en 2019, que limita o acceso á mexilla [semente do mexillón]. O sector bateeiro pide a dimisión da conselleira do Mar pola limitación da recollida de mexilla O portavoz deste grupo de mexilloeiros, Alejandro Tubío, da Federación Arousa Norte, explicou que "estamos sendo inspeccionados por todos os lados mais non aparece nin un só percebe na mexilla que recollemos". Ademais, reiterou a denuncia de que "non se contou con nós para nada" á hora de estabelecer as zonas de traballo onde poden recoller a semente. A Consellaría do Mar abrirá novas zonas A Consellería do Mar acordou coa representación das organizacións de produtores de mexillón Opmega, Amegrove e Socomgal a apertura nos vindeiros días de entre 20 e 25 quilómetros adicionais de costa á extracción de mexilla en bancos naturais. A previsión é que a apertura das primeiras áreas de traballo para o sector mexilloeiro sexa efectiva a próxima segunda feira e que se vaia completando ao longo da semana.