Así evolucionan as altas laborais nas sete cidades: Compostela lidera a xeración de emprego

Segundo os datos publicados esta segunda feira polo Instituto Galego de Estatística (IGE), a capital do país, Santiago de Compostela, situase á cabeza da xeración de emprego entre as sete grandes cidades galegas. Desta maneira, na urbe gobernada por Goretti Sanmartín (BNG) a afiliación á Seguridade Social aumentou 3,4% en novembro de 2023 (con datos correspondentes ao último día hábil do mes) con respecto ao mesmo mes do ano 2022. O incremento da afiliación na capital da Galiza, que alcanzou as 40.195 persoas de alta laboral na Seguridade Social, supón máis do dobre con respecto á taxa experimentada no conxunto do país, de 1,5% (cun total de 999.681 persoas en alta laboral). Ao aumento de persoas afiliadas á Seguridade Social en Compostela ségueo o da Coruña. Na cidade gobernada por Inés Rei (PSdeG) rexistrouse en novembro unha suba interanual da afiliación de 3,2%, alcanzando un total de 93.542 persoas afiliadas. A seguinte urbe nesta clasificación é a de Lugo, até o de agora baixo o mandato de Lara Méndez (PSdeG) e a quen Paula Alvarellos relevou. Así, na cidade das murallas houbo un incremento de altas laborais de 3,1%, cun total de 38.200 persoas afiliadas á Seguridade Social. Desta forma, tanto Compostela como A Coruña e Lugo supuxeron os motores do emprego en 2023 (a falta do dato de decembro), máis que duplicando a taxa de suba de persoas con alta laboral na Seguridade Social no país. O SMI chega a 1.134 euros pero non cumpre coa Carta Social Europea Máis de un punto porcentual por baixo da taxa da capital atópase Ourense. A cidade gobernada por Gonzalo Pérez Xácome (DO) experimentou un aumento de persoas afiliadas de 2,2%, alcanzando as 37.094. No caso de Pontevedra, onde o mandato corresponde a Miguel Anxo Fernández Lores (BNG), a taxa de incremento foi de 2% (30.102), e no de Vigo, coa Alcaldía de Abel Caballero (PSdeG), ficou en 1,7% (111.197). Ferrol, a única das cidades por baixo da media galega Ferrol é a única das sete grandes cidades da Galiza gobernada polo PP, coa Alcaldía de Xosé Manuel Rei, e tamén a única que rexistrou en novembro un incremento interanual de persoas con alta laboral na Seguridade Social por baixo da media galega. De feito, a taxa ferrolá, de 0,7%, foi de menos da metade que a do conxunto do país (1,5%), ficando o número de persoas afiliadas nesta urbe nun total de 18.723. Afiliación na Galiza En novembro de 2023 rexistráronse 1.061.546 afiliacións á Seguridade Social na Galiza, cifra practicamente idéntica á do mes anterior. Destas, 1.038.020 (97,8%) corresponden a persoas cuxa residencia se atopa nun dos concellos do país. Un mesmo traballador ou traballadora pode figurar varias veces no sistema da Seguridade Social, tantas como actividades laborais distintas desempeñe. Desta forma, ao contabilizar non o número de afiliacións, senón o de persoas afiliadas á Seguridade Social, a cifra baixou ás 999.681 persoas en situación de alta laboral. Galiza perdeu case 10.000 autónomos na última década e 1.349 só en 2023 En novembro, 5% das afiliacións á Seguridade Social de persoas que residen na Galiza corresponderon a actividades relacionadas coa agricultura e a pesca. 13,8% rexistráronse no sector industrial, 7,5% na construción e 73,2% corresponderon a actividades do sector servizos. Especialización produtiva Até 20 comarcas galegas están especializadas no sector primario Até 20 comarcas especialízanse no sector primario: Terra de Soneira, Fisterra, Muros, Noia, Xallas, A Barcala, Arzúa, Deza, Terra de Melide, A Ulloa, Chantada, o centro e o leste da Mariña, A Terra Chá, Meira, A Fonsagrada, Os Ancares, Sarria, Terra de Caldelas, A Limia e Viana. As comarcas onde se localizan as sete grandes cidades galegas, a excepción dos casos de Vigo, Ferrol e Ourense, están especializadas no sector servizos, ao igual que A Baixa Limia e Verín. O oeste da Mariña, Caldas e O Sar destacan en metalurxia e maquinaria. Pola súa parte, as comarcas de Ferrol e de Vigo están especializadas na fabricación de material de transporte e grandes reparacións industriais, da mesma maneira que no caso da Paradanta e do Morrazo. A idade legal de xubilación sobe a 66 anos e seis meses Hai tres comarcas con especialización en enerxía, subministración de auga e xestión de residuos (Terra de Trives, Ordes e Eume) e tres na industria agroalimentaria (O Salnés, O Ribeiro e O Barbanza), mentres que a da madeira, do papel e dos móbeis sobresae en Betanzos, Tabeirós-Terra de Montes, Terra de Celanova e O Carballiño. O resto da industria destaca en Ourense, Allariz-Maceda e Bergantiños. As industrias extractivas e a fabricación doutros produtos minerais non metálicos son a rama de especialización no caso de Ortegal, Quiroga, Valdeorras, O Baixo Miño e O Condado.