O presidente do comité de empresa de Alcoa San Cibrao, José Antonio Zan, cargou hoxe contra o Goberno español por deixar "en mans dos traballadores" e de "os seus avogados" o futuro da factoría de aluminio situada en Cervo.
Neste sentido, Zan confesou que a "espera" dunha solución ante o peche que pretende a multinacional estadounidense está a facerse xa "bastante longa". "De momento, cos únicos que temos contacto é coa Xunta. Co Goberno estatal hai máis dun mes que prometeron unha reunión e desde entón nin collen o teléfono", afeou.
O sindicalista volveu insistir en que a continuidade da planta de San Cibrao pasa por "unha solución política". Con todo, engadiu, o Executivo estatal "está a deixalo todo nas nosas mans e dos nosos avogados".
"Saen nas noticias dicindo moi boas cousas sen facer nada e nos 'tuits' póndose medallas que nin sequera lles corresponden", engadiu.
Mentres tanto, Zan asegurou que os traballadores manteñen "o campamento montado" coas súas protestas aos pés da factoría, aínda que coa crise da Covid tiveron que "facer unhas restricións moi grandes para que non se produza ningún contaxio". "Podería ir en contra de nós porque podería pararse a produción", explicou a este respecto.
"Nós estamos nun proceso continuo, non podemos parar e se cometemos un erro e temos un contaxio dentro da fábrica pode ser dramático para nós", insistiu.
No entanto, o presidente do comité de empresa avanzou que van seguir coas protestas, aínda que resaltou que tamén terán que ser "dunha forma distinta porque coa Covid hai que ter coidado coas mobilizacións masivas". "Agora hai que configuralas doutra forma", sinalou.
Por canto á dirección de Alcoa, José Antonio Zan destacou que por San Cibrao "non vén ninguén". "Non queren nacionalizala, pero xa a facemos (os traballadores) funcionar nós sós", concluíu.
