Xustiza e Sociedade urxe a suspensión do traslado de Villares e outros maxistrados: "A Xustiza non pode quedar exposta a presións externas"

A Asociación Xustiza e Sociedade da Galiza denunciou publicamente os "gravísimos feitos” derivados dos acordos adoptados o 12 de marzo de 2026 pola nova Presidencia da Sala do Contencioso-Administrativo do Tribunal Superior de Xustiza de Galicia (TSXG), Azucena Recio, mediante os cales se procedeu ao traslado “forzoso” de varios maxistrados da sección terceira da Sala do Contencioso-Administrativo do TSXG, entre eles Luís Villares, apartándoo dos asuntos de autorizacións eólicas, contratación administrativa e procedementos de especial transcendencia pública.

Para a asociación estas decisións foron adoptadas "sen a existencia de criterios obxectivos aprobados pola Sala de Goberno", tal e como exixe o artigo 198.1 da Lei Orgánica do Poder Xudicial, e "sen audiencia das persoas afectadas", o que constitúe, na súa opinión, "unha alteración irregular do funcionamento xurisdicional da sección" e "unha posíbel vulneración das garantías constitucionais de independencia e inmobilidade xudicial” (arts. 117 e 122 CE). Neste sentido, advertiron de que estas decisións "poden supor unha desviación de poder".

Nesta liña, alertaron de que a sección terceira da Sala do Contencioso-Administrativo do TSXG "soportou durante meses presións políticas, empresariais e mediáticas", derivadas das súas resolucións sobre proxectos eólicos e contratación pública. Ante esta situación, aseveraron que a coincidencia temporal entre devanditas presións e os traslados forzosos, “unidos á ausencia de motivación reforzada", xera a "aparencia de que a reorganización podería responder a factores alleos ao interese público". Unha decisión que para a asociación supón "un risco directo para a aparencia de imparcialidade, para a confianza cidadá no Poder Xudicial e para o funcionamento equilibrado dunha Sala especializada en asuntos de enorme relevancia”.

En relación ás accións xa emprendidas pola asociación, destacaron a comunicación formal á Sala do Contencioso-Administrativo do TSXG dun escrito no que Xustiza e Sociedade da Galiza exixe a revisión "urxente" dos acordos do 12 de marzo, así como a rectificación das decisións adoptadas e a "plena restauración dos principios de legalidade, motivación e transparencia". Neste senso, informaron de que solicitaron ao Consello Xeral do Poder Xudicial (CXPX) a apertura dun expediente informativo, a suspensión cautelar dos traslados, a emisión dun informe oficial sobre a conformidade legal do procedemento, medidas correctoras ou disciplinarias se se confirma desviación de poder ou irregularidade.

A asociación advertiu de que estes feitos constitúen "un dos episodios máis preocupantes contra a independencia xudicial nos últimos anos", apuntando a que a reorganización da sección terceira da Sala do Contencioso-Administrativo do TSXG "desmantela unha unidade xudicial altamente especializada, afecta directamente maxistrados con experiencia acreditada, e ameaza con converter as presións externas nun factor determinante na composición dos órganos xurisdicionais".

Neste senso, sinalaron que isto é "absolutamente incompatíbel cun Estado de Dereito sólido e digno de tal nome", polo que instaron a Sala e o CXPX a actuar "con contundencia, transparencia e responsabilidade, protexendo os maxistrados afectados e garantindo que ningunha decisión interna —nin presente nin futura— poida interpretarse como unha interferencia na independencia xudicial na Galiza”.

Por último, a asociación reivindicou que a Xustiza "non pode quedar exposta a presións externas. A cidadanía merece institucións independentes e críbeis".