A Audiencia de Almería acordou impor unha pena de catro anos de prisión para o futbolista do Real Club Celta de Vigo, Santi Mina, após condenalo pola comisión dun delito de abuso sexual.
Mina enfrontábase a unha acusación de agresión sexual por parte da Fiscalía e da acusación particular, que finalmente foi confirmada como abuso sexual.
Ademais, tamén foi condenado a indemnizar a vítima do abuso cunha indemnización de 50.000 euros.
O outro xogador que estaba a ser xulgado xunto co céltico, David Goldar, actualmente na disciplina da Unión Deportiva Ibiza, resultou absolto do delito de colaboración necesaria.
Orde de arredamento e liberdade vixiada
No auto da Audiencia de Almería, o tribunal tamén impón unha orde de arredamento a Santi Mina, que deberá manter unha distancia mínima de 500 metros coa vítima durante 12 anos, e un réxime de liberdade vixiada.
Esta previsto que a defensa do xogador do Celta recorra contra a sentenza.
Durante o xuízo, a letrada defensora argumentou que a noite que ocorreron os feitos, en xuño de 2019, existiu consentimento por parte da vítima do abuso sexual.
Nas tres sesións do xuízo, a defensa chamou a declarar psicólogos e un detective privado co que pretendían demostrar que non existía a afección psicolóxica que a vítima manifestara.
O Celta aparta o xogador dos adestramentos
Unha vez foi pública a sentenza da Audiencia de Almería, o Celta optou por apartar Santi Mina dos adestramentos, ao tempo que anunciou a apertura dun expediente disciplinario para "dilucidar as súas responsabilidades laborais á vista da resolución".
A entidade deportiva afirma que está na "obriga de tomar medidas fronte a aqueles feitos que menoscaban de maneira notoria a imaxe do club e atentan directamente contra os seus valores".
Pola súa parte, a agrupación Siareiros Celta Vigo condenou de maneira "enérxica" e mostrou o seu "desprezo" por uns feitos que cualifican de "intolerábeis".
A defensa de Mina anuncia que apelará
En canto á avogada defensora de Santi Mina, Fátima Rodríguez, anunciou que presentará un recurso de apelación contra a sentenza.
Segundo a letrada, o tribunal da Audiencia de Almería cometeu "importantes erros na valoración" das probas expostas durante as sesións do xuízo.
